Vise Ministra Edukasaun ba Ensino Baziku, Dulce de Jesus Soares, preokupa tebes ho estudantes sira iha rai laran, tanba barak mak seidauk hatene lee no ida ne’e preokupasaun bo’ot ida ba ministeriu.
Vise Ministra Soares, levanta kestaun ne’e hafoin hala’o vizita ba eskola ensino baziku sira iha rai laran, hodi deskobre sai katak estudantes barak mak seidauk hatene lee.
“Hau haree iha eskola barak ne’ebe hau vizita, labarik balun lee la hatene,” Vise Ministra Soares kestiona, iha Dili.
Tanba ne’e, nia husu ba professor sira at hanorin labarik sira ho diak, estudantes tenke hatene hotu lee.
Tuir nia, bainhira estudantes sira seidauk hatene lee, ne’e preokupasaun bo’ot ida ba Ministeriu Edukasaun (ME).
Nia hateten, iha tinan 2013 ate agora Ministeriu Edukasaun halo hela revizaun ba kurikulum ba primeiru no segundu siklu kona ba literasia no numerasia.
“Numerasia no literasia ne’e atu halo labarik sira sai matenek ; hatene lee no hakerek,” Vise Soares hateten.
Kona ba estudantes ne’ebe seidauk hatene lee, Jerente Programa Edukasaun Fundasaun Alola, Ema de Sousa Freitas, hateten ne’e depende ba kualidade husi profesores sira.
“Ministeriun Edukasaun tenke fo informasaun ba profesor sira oinsa hanorin labarik sira sai matenek,” Jerente Programa Sousa sujere.
Entretantu Profesora Eskola Padre Monteiro Bedois, Igilda Madalena Soares, rekonese katak alunus barak mak seidauk hatene lee.
“Ami presiza tebes apoia husi inan aman sira atu hanorin oan sira iha uma, tanba oras barak liu mak iha uma,” nia sujere.
