Hafoin halo inspesaun ba iha aimoruk kontainer 19 ne’ebe kompania Kimia Farma hatama Komisaun Receive National and Inspection (RNI) rezeita aimoruk kuaze kontainer ida, tanba data expire badak no la tuir kontratu.
Reprejentante RNI, Saturnina Ximenes, hateten inspesaun ne’ebe sira hala’o bazeia ba iha kontratu ne’ebe Ministerio Saude ho Kimia Farma halo iha tinan kotuk no lista aimoruk ne’ebe propoin ba iha Kimia Farma atu hatama.
Nia haktuir, sira rezeita aimoruk ho kuantidade kontainer ida, tanba bazeia ba iha kontratu ne’ebe iha Kimia Farma tenke garantia aimoruk ne’ebe hatama nia data expire tinan rua ba leten.
“Ami halo inspesaun tuir kontratu ne’ebe Ministerio Saude ho Kimia Farma iha ba items ne’ebe la tuir ami rezeita rai ketak iha kuaze kontainer ida mak ami rezeita ona atu Ministerio Saude bele halo komplain ba iha kompania atu haruka fali,” Ximenes hateten bainhira halo inspesaun ba aimoruk iha Armagen Servisu Autonom Medikamentus e Ekipamentus Mediku (SAMES) Kampung Alor, Dili.
Nia hatutan, kuantidade aimoruk ne’ebe tama bo’ot susar mos ba sira atu halo inspesaun lalais dificulta mos ba iha distribuisaun ba iha fasilidade saude sira hotu ne’ebe presiza.
Entretantu Xefe Armagen SAMES, Domingos Afonso, rekonese katak iha duni items aimoruk balun ne’ebe ekipa inspesaun rai ketak ona, tanba tuir kontratu data expire, labele tinan rua mai kraik.
“Iha aimoruk balun mak nia data expire tinan rua mai kraik ne’e mak ami halo inspesaun atu fo hatene ba Ministerio Saude hodi husu responsabilidade kompania nian bele troka fali,” nia hateten.
Iha parte seluk, Prezidente Komisaun F (saude, edukasaun, kultura, veteranus no igualdade jeneru), Deputadu Virgilio da Costa Hornai, hateten ne’e responsabilidade Ministerio Saude nian atu koalia ho kompania sira.
“Problema mak kontratu selebra iha tinan 2013, aimoruk tama iha 2014 tinan klaran ho kuantidade ida bo’ot, bele over stok no estraga bainhira la haree didiak,” nia dehan.
Hatan ba kestaun ida ne’e, Ministru Saude, Sergio da Costa Lobo, katak sei koalia ho Kimia Farma atu haree ba problema ne’e tanba kontratu halo ho fabrika ne’ebe laiha problema hein kontaktu deit ba sira husu sira nia responsabilidade.
“Ita kontratu direita ho fabrika Kimia Farma tanba ne’e mosu situasaun hanesan ne’e ita bele kontratu direitamente ho fabrika ne’e husu sira nia responsabilidade,” Ministru Lobo hateten.
