Transporte sai obstaclu bo’ot ba iha Servisu Autonomo Medikamentus e Ekipamentus Saude (SAMES) atu halo distribuisaun aimoruk ba fasilidade saude iha teritorio tomak, tanba iha deit kareta box hat.
Diretor Nasional Armagen SAMES, Domingos Afonso, hateten prosesu distribuisaun aimoruk kada fulan tolu ba iha sentru saude sira iha teritorio tomak tuir pedidu ne’ebe sira hatama no kada fulan ba iha Ospital Nasional Guido Valadares.
“Ami iha kareta box hat, kuandu ami simu pedidu husi sentru saude sira iha teritorio tomak ami prepara aimoruk tuir pedidu ne’ebe iha no halo distribuisaun kada distritu ida kareta box rua,” Diretor Afonso hateten, iha Kampung Alor, Dili.
Alende ne’e, nia mos preokupa kona ba kombustivel ne’ebe sai mos obstaklu ba iha prosesu distribuisaun aimoruk, kada fulan tolu SAMES distribui aimoruk.
Iha parte seluk, Deputadu Eladio Faculto, lamentavel ho situasaun ida ne’e tanba ho kuantidade aimoruk ne’ebe barak iha armagen la halo distribuisaun ne’ebe diak.
“Sira nia transporte ne’e iha rua deit, se fasilidade saude iha 13 distritus husu hotu aimoruk iha tempu hanesan difisil, ne’e desaraska,” Deputadu Faculto proekupa.
Tanba ne’e membru Komisaun F (saude, edukasaun, kultura, veteranus no igualdade jeneru), ne’e husu ba Ministeriu Saude (MS) atu haree problema ida ne’e ho seriu.
“Tanba sentru saude sira laiha aimoruk,” nia dehan.
Hatan ba kestaun ida ne’e Vise Ministra Saude asuntu apoiu Jestaun e Rekursu Humanu, Maria do Céu Sarmento Pina da Costa, rekonese kestaun maibe distribuisaun regular kada fulan tolu ne’e obrigatorio.
Nia dehan, problemas principal ne’ebe dadaun ne’e sentru saude sira infrenta mak falta de armagen hodi rai aimoruk.
“Kuandu emergensia, sira bele mai ho sira nia kareta hodi tula tuir kuantidade ne’ebe sira presiza, tanba kareta ki’ik,” Vise Ministra Céu hateten.
