Oras ne’e dadaun kazu violensia domestika hamutuk 119 mak sei pendente hela iha Ministeriu Publiku (MP), no seidauk halo akuzasaun tanba vitima la kolabora.
Kuandu vitima iha kolaborasaun diak ho MP, Prokuradoria asuntu Violensia Domestika, Ivonia M. Guterres, hateten loron rua tolu akontese, nia prosesu determina no hasai kedas akuzasaun hasoru arguidu no haruka ba tribunal halo julgamentu.
“Bainhira akontese krime, vitima sente hirus entaun halo keixa, maibe liu semana ida rua, ita telephone sira la hatan, ami haruka ofisial justisa ba to’o iha fatin ne’ebe nia indika, ema hotu la konese, sira subar an ba justisa, tanba ne’e mak pendente,” Prokuradoria Guterres esklarese, iha Delta Nova Dili.
Nia hatutan, kazu pendente sira ne’e husi tinan 2013 to’o Junu 2014. Kazu ne’ebe MP halo ona akuzasaun final no haruka ona ba tribunal atu halo prosesu julgamentu hamutuk 236.
Iha parte seluk, Diretor Ezekutivu Programa Monitorizasaun ba Sistema Judisial (JSMP), Luis Oliveira Sampaio, konsidera implementasaun lei kontra violensia domestika iha progresu bo’ot, tanba autor judicial no ema hotu fo importansia ba krime violensia domestika.
Nia fo ezemplu; kazu akontese iha tinan 2013, desizaun iha inisiu 2014. “Ne’e diak, uluk la’e bele han tinan tolu,” Diretor JSMP Sampaio hateten.
Nia hatutan, sistema justisa oras ne’e dadaun iha progresu atu la’o diak liu tan kolaborasaun ema hotu nian importante liu –liu vitima sira, tanba vitima nia lian iha justisa mos iha.
