Diretor Nasional Apoiu Servisu Ospitalar e Enkaminamentu Ministerio Saude, Horacio Sarmento da Costa, hateten kareta ambulansia hamutuk neen (6) mak labele hadia ona, tanba presiza kustu bo’ot.
Enkuantu total ambulansia ne’ebe durante ne’e sirkula iha 13 distritus, director ne’ dehan, hamutuk 44 resin, maibe ambulansia 12 mak dadaun ne’e funsiona iha distritus hodi halo evakua ba pasiente emergensia sira.
“Ambulansia barak mak at hotu,balun agora iha hela ofisina, hadia hela, e ambulansia neen ne’e labele hadia tanba presiza kustu bo’ot,” Diretor da Costa hateten, iha Kaikoli, Dili.
Nia hatutan, tinan ida ne’e Ministerio Saude (MS) sosa tan kareta ambulansia hamutuk 16, ne’ebe oras dadaun monta hela radio no ekipamentus seluk atu halo distribuisaun ba distritus ne’ebe presiza.
Iha parte seluk, Membru Prarlamentu Nasional, Deputada, Domingas Alves da Silva “Bilou –Mali”, husu ba MS atu hadia lalais jestaun manutensaun ba kareta ambulansia, tanba kareta ambulansia sira iha distritus maioria at tinan rua tolu ona la resolve to’o agora.
“Sentru saude distritu Ermera, sira iha kareta ambulansia no multifusaun hat, rua mak at la funsiona, dificulta tebes servisu sentru nian,” nia dehan.
Membru Komisaun F (saude, edukasaun, veteranus, igualdade jeneru) ne’e, prekupa ho jestaun kareta ambulansia tanba durante ne’e kareta ambulansia ida at tenke lori to’o nasional hodi halo manutensaun ho tempu ne’ebe naruk.
Nia dehan, transporte sai obstaclu bo’ot ba atendimentu saude iha nivel sub-distritus, liu –liu area remotas sira tanba sira tenke hula no tula moras sira iha karosa (gerobak) dudu lao ain ho distansia do’ok hodi asesu ba fasilidade saude.
Entretantu Ministru Saude, Sergio da Costa Lobo, hateten iha inisiu kedas ministerio hakarak senraliza manutensaun kareta iha distritu, maibe susar tanba ministerio ida kareta iha distritu kuaze 13 deit.
“Ministerio Saude deit ne’e susar maibe kaundu iha ona sistema sentralizasaun ida diak hanesan sentraliza aktividade manutensaun kareta ministerio sira hotu ba distritu inklui mos pembelian ATK ne’e diak,” dehan Ministru Lobo.
Nia haktuir, sira aloka $500 ba distritus sira atu halo manutensaun kareta, maibe kuandu kustu liu ida ne’e, lei jestaun financial la fo dalan.
Ministru Lobo mos preokupa ho situasaun infra-struktura iha teritorio tomak ne’ebe la kontribui ba movimentasaun kareta ambulansia, tanba ne’e atu kareta ambulansia labele at parte infra-struktura mos tenke diak.
