Komunidade iha 244 sukus iha teritorio Timor –Leste durante ne’e la hetan asistensia saude, tanba seidauk iha postu saude.
Reprejentante povu iha Parlamentu Nasional, Deputada Domingas Alves da Silva “Bilou –Mali”, preokupa ho situasaun ida ne’e no husu Ministerio Saude atu fo atensaun lalais ba kestaun ne’e.
“Povu hotu iha direitu atu hetan asistensia saude, maibe realidade iha maioria komunidade la asesu ba asistensia saude,” Deputada Bilou Mali preokupa, iha Parlamentu Nasional.
Nia dehan, komunidade sira iha area remotas durante ne’e uja deit aimoruk tradisional hodi kura sira nia moras, tanba sira susar atu asesu ba fasilidade saude.
“Hau fo ezemplu konkretu, iha suku Aitana sub-distritu Lacluta ita nia populasaun barak liu iha ne’eba maibe laiha postu saude ida, presiza atu haree,” nia hateten.
Nia hatutan, la’os suku Aitana deit, maibe iha komunidade barak mos iha area rural sira durante ne’e la hetan asistensia saude no iha balun mak la konsege salva husi moras ne’ebe sira sofre, liu –liu inan isin rua sira.
Entretantu Ministru Saude, Sergio da Costa Lobo, rekonese kestaun ne’e no foin iha suku 198 mak asesu ba postu saude.
“Maibe hau husu ona ba diretor distritu sira, atu halo re-orientasaun ba kuidadus primarios atu garantia servisu la’o nafatin,” Ministru Lobo hateten.
Nia haktuir, atu garantia asistensia saude ba sukus hotu-hotu kontribuisaun komunidade importante tebes, liu –liu oferese fatin ba pesoal saude sira atu fo tratamentu.
“Hau fo ona orientasaun ba diretor distritus sira atu mobiliza komunidade sira iha suku laran ministerio ajuda osamentu oituan sira halo uma aguenta tinan ida rua hodi hein osamentu aprova halo postu permanente,” Ministru hateten.
