Governu Timor –Leste reprezenta husi Diretor Air Timor asina akordu Memorandum of Understanding (MoU) ho kompania Garuda Indonesia, kona ba operasaun aviaun Garuda Indonezia iha Timor –Leste.
Diretor Air Timor, Abeesy Bento, hateten MoU ne’e hanesan meius ida atu kesi metin koperasaun servisu entre Air Timor no Garuda Indonesia iha area transportasaun hodi responde ba nesesidade ne’ebe iha.
“Koperasaun entre Garuda ho Air Timor ne’e ho objetivu atu fasilita deit pasajeirus husi Denpasar mai Dili,” Diretor Bento hateten, hafoin asina MoU iha Palacio Governu, Dili.
Nia haktuir, sei iha posibilidade atu estende ba fatin sira seluk ne’ebe oras ne’e dadaun Garuda Indonesia halo ona operasaun, maibe agora sei focus iha Denpasar mai Timor.
Kona ba presu Garuda Indonesia Denpasar-Dili, nia dehan, balansu ho transportasauns sira seluk, nune’e bele iha kompetisaun ida ne’ebe diak entre kompania sira ne’e.
Entretantu Prezidente/Chief Executive Officer (CEO) Garuda Indonesia, Emirsyah Satar, hateten operasaun aviaun Garuda Indonesia Denpasar-Dili, sei hahu iha fulan Otubru tinan ida ne’e (2014), tanba iha fulan Setembru nia laran sei iha preparasaun.
“Espera katak ami bele fasilita diak liu tan pasajeirus sira husi Denpasar mai Dili atu bele kontribui mos ba dezenvolvementu ekonomia nasaun rua ne’e nian,” nia hateten.
Antes ne’e nia dehan, sei fo uluk kapasitasaun ba Timor oan sira, tanba prezensa Garuda Indonesia iha Timor –Leste fo mos servisu ba Timor oan sira.
