Ministeriu Edukasaun (ME) konkorda bainhira igreja Katolika loke Universidade Katolika (UNIKA) iha Timor-Leste, maibe tenke preenxe kriterius ne’ebe iha.
Diretor Jeral Servisos Corpotivos Ministeriu Edukasaun Antoninho Pires, hateten kriterius ne’ebe presiza preenxe mak tenke iha rain, edifisiu, fasilidades kompletu,no iha dosente no kurikulum rasik.
“Ne’e diak liu, tanba dalabarak igreja mak loke eskola ne’e nia kualidade diak,” Diretor Jeral Pires hateten, iha Vilaverde, Dili.
Nia dehan, durante ne’e igreja Katolika loke ona eskola barak, husi pre-primaria, primaria, pre-sekundaria, sekundaria to’o universidade ne’ebe kualidade diak.
“ Hau fiar katak aban bainrua Universidade Katolika foun ne’ebe loke iha Balide ne’e iha kualidade, tanba dedikasaun husi igreja halo estudantes iha kualidade,” Diretor Jeral ME ne’e esperansa.
Nia mos rekonese, katak lolos ME laiha konesementu kona ba igreja Katolika harii universidade ida ne’e, maibe importante mak preenxe kriterius ne’ebe governu determina ona.
“Se mak hakarak loke eskola tenke iha rai, edifisiu, meja-kadeiras, dossente ho programa kulikular,” nia hateten.
Nia hateten, se buat hirak ne’e kompletu ona ME bele legaliza, se seidauk labele legaliza.
Entretantu reprezentante igreja Katolika, Padre Guilhermino da Silva, hateten konstrusaun universidade ne’e agora la’o hela no laiha problema.
“Uluk mak iha problema kona ba rai atu harii universidade ne’e, maibe agora rezolvidu no konstrusaun la’o dadaun,” Pe.da Silva hateten via telefone.
Pe. Da Silva informa, lolos konstrusaun ne’e remata iha fulan Novembru tinan ne’e tuir kontratu ne’ebe iha, maibe tanba problema negosiasaun no orsamentu entaun prolonga tan to’o fulan Marsu tinan oin tenke remata.
Kona total orsamentu ba projetu ne’e, Pe.da Silva hateten, orsamentu ne’e mai husi estadu Timor-Leste, husi doadores no husi diocese rasik. “Total hau la hatene, maibe osan barak los,”.* Iha parte seluk Estudante Universidade Nasional Timor Lorosa’e (UNTL), Liborio Pinto, hateten, ne’e inisiativu ne’ebe diak husi igreja Katolika loke universidade foun iha Timor-Leste.
“Ne’e diak liu, tanba agora dadaun estudantes barak mak buka eskola iha rai liur, tanba dehan universidade iha rai laran laihakualidade,” nia hateten.
Tanba ne’e, nia espera katak, ho prezensa UNIKA ne’e bele hadia dezenvolvementu edukasuan iha rai laran ho diak liu.
