Atu asegura sidade Dili livre husi fo’er, dadaun ne’e Ministerio Administrasaun Estatal destaka ona Pesoal Kontrolu Lixu (PKL) iha 21 sukus, iha distritu Dili nudar kapital ba nasaun Timor –Leste.
Ministru Administrasaun Estatal (MAE), Jorge da Conçeicão Teme, hateten PKL nia papel mak kontrolu lixu iha suku laran, kontaktu ba iha ekipa intervensaun rapida rekolha no foti hodi tau iha Tibar.
“Ami monta ona ekipa pesoal kontrola lixu ne’ebe loron-loron la’o haleu suku, atu haree lixu iha ne’ebe 21 sukus,” Ministru Teme hateten, iha Sentru Konvensaun, Dili.
Alende ne’e, nia dehan, MAE mos apoia fundu ba kada suku iha Dili laran, atu mobiliza komunidade sira halo limpeza iha suku laran semana ida dala rua. “Depende ba planu sukus nian inklui mos halo sosializasaun edukasaun atu hasa’e konsiensia komunidade sira nian, oinsa hadomi ambiente,” nia dehan.
Iha parte seluk, Xefe do Suku Santa Cruz, Manuel Correia, rekonese katak pesoal sira ne’e dadaun ne’e iha ona sukus hamutuk ho ekipa jestaun kontrola lixu (forma husi lideransa komunitaria atu halo jestaun ba iha lixu nivel sukus.
“Ami forma ekipa ne’e liu husi eleisaun, sira ne’e mak haree kona ba lixu iha suku no kontrolu husi pesoal kontrola lixu,” Xefe Suku Correia hateten.
Nia hatutan, presiza kontinua halo sosializasaun edukasaun kona ba soe foer nian, tanba komunidade balun seidauk iha konsiensia.
Entretantu Komunidade Comoro, Jose Fernandes, apresia esforsu governu nian, maibe presiza haree fila fali programa sira ne’ebe governu implementa iha suku laran.
“Aloka osan ba iha sukus, tau ekipa kontrola lixu, maibe realidade parte balun foer sei soe namkari hela,” nia dehan.
“Tenke aplika sansaun ba ema sira ne’be soe fo’er arbiru, husik animal no seluk tan,” nia sujere.
Tuir nia, so sansaun mak ultimo solusaun atu resolve problema lixu iha sidade laran, tanba baze legal iha ona.
