Organizasaun Forum Tau Matan (FTM) sujere ba governu tenke kontrola ba labarik menoridade sira ne’ebe mak gosta fuma sigaru, nune’e bele prevene ba sira nia saude.
Diretora FTM, Ana Paula Sequeira, hateten governu tenke kria lei ida kona ba labarik menoridade sira ne’ebe mak fuma sigaru no droga, tenke kontrola ho didiak.
“Governu tenke tau politika ida atu kontrola ba kompania ne’ebe mak fa’an sigaru no droga ba labarik ki’ik sira,” Diretora FTM ne’e sujere, iha Kaikoli, Dili.
Tanba tuir nia, agora ne’e labarik sira fuma sigaru hamutuk ho droga, sigaru ne’e bele estraga labarik sira nia saude.
Diretora ne’e kompara, kuandu iha nasaun seluk bainhira labarik sira ba sosa sira sigaru tenke lori ho sira nia ID card hatudu ba kompania (sigaru nian), tuir lei sira ne’ebe idade to’o ona (19 no 20 anos ba leten) mak bele fuma, sira ne’ebe seidauk la autoriza.
“Maibe iha ita nasaun ne’e lei ida hanesan ne’e laiha,” Diretora FTM ne’e hateten.
Entretantu Jacob Zacarias Guimaraes, hanesan aman ida, husu ba governu tenke kria politika ida hodi bandu labarik menoridade labele fuma sigaru, “ kuandu sira fuma tenke fo sansaun,” nia dehan.
Iha parte seluk Deputadu Eladio Faculto, husu ba inan aman sira atu tau matan didiak ba sira nia oan sira, nune’e labele involve iha droga no sigaru.
“Hau mos husu ba kompania ga loja nain sira atu hasa’e folin sigaru nian, tanba se la’e, labarik sira mai sosa bei-beik no fo impaktu ladiak ba sira nia saude,” nia sujere.
