Partisipasaun feto iha area desportu iha progresu diak, ida ne’e hatudu liu husi prestasaun ne’ebe atleta feto sira halo iha eventu internasional sira hanesan Sea Games no eventu seluk tan durante ne’e.
Sekretariu Estado Joventude e Desportu, Miguel Marques Manetelu, hateten maske Timor-Leste nudar nasaun foun, maibe feto sira mos hahu hatudu sira nia prestasaun iha nivel internasional.
“Kempo no modalidade seluk ita haree, katak kuaze eventu sira iha liur feto barak mos hetan medalia osan mean, tanba ne’e iha desportu mos ita promove feto liu husi prestasaun sira ne’ebe feto sira hatudu iha eventu internasional,” SE Manetelu hateten.
Enkuantu atleta Kempo, Mekita Lebre Ximenes, hateten desportu ne’e la konese feto no mane atu modalidade saida deit, tanba ne’e partisipasaun feto importante tebes.
Ho esforsu no badinas treinu, nia dehan, atleta feto oan ne’e hamorin ona Timor-Leste nia naran hodi tuir eventu Sea Games iha Myanmar, iha tinan kotuk.
“Hau konsege lori medalia osan mean ida mai Timor –Leste,” nia dehan.
“Ida ne’e anesan motivasaun ida ba feto maluk sira seluk, katak feto mos bele hola parte iha desportu hanesan atleta,”.
Maske hasouru obstaklu oi-oin,maibe nia dehan, ida ne’e sai hanesan motivasaun ida ba feto sira atu hakat no hatudu prestasaun iha area desportu barak liu tan iha futuru.
Entretantu Vise Prezidente Atleta Kempo, Domingos Savio, hateten partisipasaun feto iha modalidade Kempo ne’e positive tebes, no hatudu ona ba internasional katak feto Timor mos bele.
Nia haktuir, iha Sea Games Myamar tinan kotuk modalidade Kempo feto ida hetan medalia osan mean ida tanba hetan primeiru lugal no ida seluk hetan osan mutin ida.
“Uluk feto nia partisipasaun iha modalidade kempo feto oituan deit, maibe ho prestasaun ida ne’e feto barak los ona involve iha Kempo,” nia hateten.
Total atlet Kempo, nia dehan, dadaun ne’e hamutuk 150 resin kobre distritu Lautem, Baucau, Maliana, Dili no seluk tan maioria husi feto hamutuk nain 108.
