Mosu desintendementu entre pesoal saude durante ne’e kona ba dekretu lei rejime espesial, tuir membru Parlamentu Nasional, katak ida ne’e tanba menus de sosializasaun informasaun ne’ebe klaru.
Membru Komisaun F (saude, edukasaun, kultura, veteranus no igualdade jeneru), Deputada Ilda Maria da Conçeicão, hateten dekretu lei no. 20/2012 kona ba regime espesial ne’e hakerek klaru se mak iha direitu atu hetan regime ne’e, tanba ne’e presiza divulga ba iha pesoal sira hotu atu komprende.
“Hau haree dekretu lei ne’e hakerek klaru iha ne’eba pesoal saude sira mak la hatene sira nia direitu to’o iha ne’ebe,” Deputada Ilda hateten, iha Parlamentu Nasional.
Tanba ne’e nia husu ba Ministerio Saude tenke halo divulgasaun ba lei ne’e hodi esplika klaru ba iha pesoal saude sira. “Ida ne’ebe mak iha direitu atu hetan regime espesial,”.
Nia haktuir, dekretu lei ne’e hakerek klaru ema ne’ebe iha direitu atu hetan regime espesial mak pesoal saude sira ne’ebe ativu fo atendimentu ba pasiente sira, sira ne’ebe nivel edukasaun profesional saude (medikus,emfermeirus, parteira) maibe tur iha struktura administrasaun laiha direitu ba regime espesial.
Alende ne’e, nia dehan, problema seluk mak kolokasaun ema la tuir nia edukasaun, hanesan medikus foti ba tau fali iha administrasaun ema ne’ebe lisensiadu administrasaun la tau iha administrasaun.
Iha parte seluk, Ministru Saude, Sergio da Costa Lobo, rekonese sosializasaun dekretu lei ne’e ba iha pesoal saude sira seidauk masimu, tanba ne’e iha ona ekipa ida atu halo divulgasaun ba pesoal saude iha tempu badak.
“Uluk ami halo tiha ona sosializasaun kona ba dekretu lei regime kareira espesifiku iha distritus, maibe seidauk sufsiente tanba ne’e ami sei nafatin halo divulgasaun,” Ministru Lobo hateten.
Ministru Lobo mos ameasa, atu dada fila fali pesoal saude sira ne’ebe hetan ona regime espesial, maibe nia dezempeiu la diak ba iha regime jeral hanesan funsionario publiku sira seluk katak salario sei la aumenta.
