Atu estandariza pasaporte Timor-Leste tuir padraun internasional, Ministru Justisa, Dionisio Babo Soares, katak dadaun ne’e tama ona iha prosesu tenderizasaun.
Ministru Justisa, Dionisio Babo Soares, hateten ministeriu informa ona ba Ajensia Dezenvolvementu Nasional (ADN) loke tenderizasaun hodi fo dalan ba kompania internasional atu kompete.
“Agora foin mak kompania rua deit, ida husi singgapura, Portugal, no ida fali seidauk klaru, maibe ami husu atu foti husi nasaun ne’ebe la hanesan,” Ministru Soares hateten, iha Pantai Kelapa, Dili.
Nia hateten, kompania sira ne’e mai husi estrangeriu ne’ebe ho kualifikadu no iha duni kualidade.
“Tenke la’o tuir prosesu normal, e agora iha hela parte aprovisionamentu,” nia hateten.
Tuir Ministru Babo Soares, prosesu ne’e tenke liu husi ADN tanba osan ne’ebe sei aloka ba ida ne’e hamutuk Un Miliaun ba leten.
Iha parte seluk Deputada Josefa Alvares Soares, hateten esforsu ne’ebe govenru halo ne’e diak, maibe presija hatene lolos kompania nia prestasaun de servisu, hodi nune’e bele garante passaporte ho padraun internasional ne’ebe kualidade duni.
“Se la’e ita fakar osan deit,” Deputada Soares hateten.
Nia mos sujere atu governu haruka tekniku Timor oan atu akomphania komphania estrangeiru sira halo passaporte hodi nune’e bele iha kunhesementu ba asuntu ne’e.
