Organizasaun Haburas fo kapasitasaun ba grupo turismu komunitario iha distritu Lautem, Liquisa no distritu Aileu kona ba jestaun, kulinaria no matadalan ba visitor sira.
Diretor Ezekutivu NGO Haburas, Virgilio Guterres, hateten formasaun importante tebes ba iha komunidade sira, atu garantia katak komunidades mak nain ba riku soin ne’ebe iha sira nia suku laran.
“Ami fasilita deit treinamentu kona ba jestaun, atu nune’e bele halo jestaun ba rekursu ne’ebe sira iha,” Diretor Haburas, Guterres hateten, iha Dili.
Nia haktuir, turismu hanesan setor sustentavel ida atu subtitui setor petrolifera ne’ebe oras ne’e dadaun estado Timor –Leste garantia ba hodi hadia povu nia moris.
“Ita dehan sustentavel bainhira ita halo jestaun diak, tanba bele fo rendimentu sustentavel ba estado kompra ho mina ne’ebe tempu ida sei maran,e turismu sei la lakon,” nia hateten.
Grupo turismu komunitario ne’ebe hetan ona kapasitasaun husi NGO Haburas mak hanesan grupo Walu Sere iha Tutuala, distritu Lautem, ida iha Maubara no Maubise kona ba kuda aifunan nian.
Nia dehan, kestaun merkaduria sai bareira bo’ot ida ba produtor sira atu produs sira nia produtu, hanesan produs kripik, jus inklui mos produtu softener, arte zenatu sira, maibe governu la kria fatin ida ba sira atu fa’an sira nia produtus.
Iha parte seluk, Koordenadora Grupo Buka Moris Foun, Sabina de Jesus Moreira, hateten nia grupo seidauk hetan formasaun durante ne’e, tanba foun.
“Hau foin hatama hau nia grupo nia naran ba NGO Haburas, karik iha futuru ami sei hetan formasaun, tanba kapasitasaun ne’e importante tebes ba ami hodi hadia ami nia kualidade produsaun,” nia dehan.
Nia mos lamenta ho atividade feira sira ne’ebe governu organiza, tanba la fo informasaun ba sira.
“Feira ne’e oportunidade ne’ebe diak ba ami atu hetan netik osan ruma husi sira nia produtu maibe realidade ne’ebe iha la hetan partisipasaun ne’ebe maximu husi konsumidores,” nia hateten.
