Maske foin sai membru Extractive Industry Transparancy Inisiative (EITI) iha tinan hirak liu ba, maibe tuir Ministru Petroleu no Rekursus Minerais, Alfredo Pires, katak Timor-Leste sai ezemplu diak iha mundu, tanba hetan susesu bo’ot ba sistema transparensia iha setor petrolifera.
Ministru Pires, hateten nasaun membru barak mak tebes sai husi Sekretariadu EITI, tanba la priense rekijitus no la responde ba ejizensia EITI, maibe Timor-Leste dadaun ne’e lidera iha Asia Pasifiku.
“No ativu fahe esperiensia ho nasaun seluk kona ba transparansia iha setor petrolifera,” Ministru Pires hateten.
Tuir nia, transparensia ne’e importante tebes, tanba bele publika prosesu hotu kona ba produsaun mina no osan, tau iha internet atu ema hotu inklui mos peritu sira iha liur bele asesu no analiza hamutuk.
“Kuandu ita la tau iha internet prosesu sira ne’e hotu, entaun ema la hatene, entaun tau iha internet para ema bele halo analiza,” Ministru Pires afirma.
Ministru ne’e mos rekonese, katak sira sei menus rekursu humanu iha parte haree impostu mina nian, maibe iha area identifikasaun mina no ke’e mina balun iha ona maske sei limitadu no presiza kapasita tan.
Iha parte seluk, Diretor Ezekutivu Forum Nasional Timor-Leste (FONGTIL), Arsenio Pereira da Silva, sente ourgulhu tanba Timor –Leste maske nasaun foun, maibe hetan rekor diak iha mundu internasional kona ba tranparansia petrolifera.
“EITI Timor-Leste, ita numeru tres iha mundu no numeru um iha Asia. Buat ida ne’ebe ita tenke orgulhu no ita tenke defende rekor ida ne’e no dezenvolve diak liu tan iha futuru,” Pereira hateten.
Entretantu reprezentante sosiedade sivil iha EITI, Nelson Miranda, promete sei kolabora diak liu tan ho kompania industria mina sira atu desimina informasaun ba publiku kona ba dezenvolvementu setor petrolifera.
“Ami iha komitmentu atu kolabora ho industria mina sira hodi informa dadus no informasaun sira hotu liga ho mina nian ba iha sosiedade sivil sira no publiku,” nia hateten.
