Membru Parlamentu Nasional konsidera servisu Polisia Investigasaun Kriminal (SIK) failha, tanba to’o agora seidauk detekta autor ba kazu mutilasi ba vitima MV.
Deputada Ilda Maria da Conceicao, hateten kazu mutilasi ba vitima MV ne’e tinan tolu ona, maibe to’o agora seidauk hetan autor ne’e.
“Polisia failha, lolos sira nia difikuldade ne’e iha ne’ebe los,” Deputada da Conceicao kestiona, iha Parlamentu Nasional.
Tuir nia, familia vitima bele lakon fiar, kuandu Servisu Investigasaun Kriminal (SIK) arqivu tiha ou nafatin la detekta autor.
Kazu mutilasi a vitima MV ne’e rasik akontese vitima lakon ga sai husi uma iha dia 14 Abril 2012, Pantai Kelapa noe ikus mai hetan fali nia isin mate (mutilasi ulun ketak tiha ho isin lolon) iha area Akanunu-Metiaut iha 23 Abril 2012.
Tanba ne’e nia husu ba polisia SIK atu kontinua buka tuir autor ba kazu ne’e, to’o hetan.
Hatan ba preokupasaun ne’e Komandante Ezersisiu, Inspektor Xefe Manuel Alves, rekonese katak prosesu investigasaun ba kazu ne’e la fasil.
“Testamuna seidauk forte atu hato’o sira nia depoitmentu,” nia dehan.
Alende ne’e nia dehan, difikuldade seluk mak to’o agora SIK susar atu hetan testamunha voluntaria ne’ebe ho brani koalia konaba kazu ne’e nia hun.
“Laiha komunidade ida mak atu koalia mai,katak nia haree ho matan,” nia hateten.
Kona ba arqivu ou la’e kazu ne’e, nia dehan, ne’e kompetensia Ministeriu Publiku nian.
