Sekretariu Estadu Politika Formasaun Profesional e Empregu (SEPFOPE) aprova ona lista eis funsionario Indonezia hamutuk 22,000 resin ne’ebe sei hetan sira nia direitu.
Diretor Nasional Relasaun do Trabalho SEPFOPE, Angelo dos Santos Veloso, hateten lista naran benefisiario sira ne’e kompostu husi eis polisia, military no funsionario sira hetan ona aprovasaun no haruka ona ba iha 13 distritus hodi halo pagamentu.
“Orsamentu tama ona iha rekening SEPFOPE nian iha BNCTL ho montante $ 22,000 resin, agora prontu ona no halo pagamentu dadaun ona hahu fulan Julhu to’o Dezembru 2014,” Diretor Veloso hateten, iha Parlamentu Nasional.
Nia haktuir, pagamentu THT (Tunjangan Hari Tua) mak hala’o ona iha tinan hirak liu no ba tinan ida ne’e pagamentu kona ba Nilai Tunai Yuren Pensiun, ne’e sira hotu iha direitu atu hetan sira nia osan.
kona ba eis funsinariu ne’ebe la tama iha lista, nia dehan, sei halo verifikasaun atu nune’e submete ba iha Indonezia atu kompara ho database ne’ebe sira iha, “SEPFOPE so implementa deit, osan mai husi Indonezia,” nia dehan.
Iha parte seluk, eis military Indoensia, Francisco Aparicio, hateten ne’e obrigasaun governu Indonezia nian atu fo, tanba ne’e funsionario sira nia direitu.
“Hau hanoin importante mak sosializasaun infromasaun no dadus, atu prosesu pagamentu ne’e labele mosu deskontente entre benefisiario sira inklui mos ekipa ne’ebe atu halo pagamentu,” nia dehan.
