Membru Parlamentu Nasional konsidera politika governu muda negosiante roda tolu laiha nia kontinuidade, tanba negosiantes kontinua okupa estrada ninin no ponte leten hodi fa’an sira nia sasan.
Deputada Maria Fernanda Lay, hateten governu iha ona baze legal, so ke implementasaun mak seidauk efetivu.
“Supervizaun laiha nia kontinuidade, vendedore sira fila fali, liu –liu iha ponte Becora ita fila kalan liu ladiak, ne’e ami foti beibeik ona,” Deputada Lay kestiona, iha Parlamentu Nasional, Dili.
Tuir nia, governu tenke rutina halo atuasaun ba vendedor sira no sosializa informasaun ba sira, tanba desizaun ne’ebe sira foti bele kontribui ba iha asidente trafiku.
Iha parte seluk, Membru Komisaun D (ekonomia e dezenvolvementu), Deputada Josefa Alvares Pereira Soares, hateten governu tenke ezekuta regulamentu ne’ebe iha ho seriadade ba vendedores sira.
“Muda tiha vendedores sira ne’e maibe laiha kontinuidade, entaun sira mai fali Estrada ninin hodi hetan osan lalais,” nia hateten.
Entretantu Ministru Administrasaun Estatal (MAE), Jorge da Conçeicão Teme, rekonese katak atuasaun Diresaun Ordem Publika durante ne’e seidauk masimu. “Tanba falta rekursu humanu no transportes atu kontrola ho rutina,” nia hateten.
Nia dehan, kontrola negosiantes roda tolu la’os fasil, presiza tempu atu konsensializa informasaun ba sira.
“Ami iha kareta ida deit atu kontrola iha Dili laran, kuandu ami kontrola iha Becora, sira Comoro mai fa’an iha estrada ibun, ami hafuhu malu deit,” Ministru Teme hateten.
