Bazeia ba rezultado peskiza Ministerio Saude ho UNICEF kona ba aihan no nutrisaun iha TL tinan 2013, hatudu katak 50% labarik Timor –Leste idade tinan lima mai kraik sofre mal nutrisaun.
Xefe Departamentu Nutrisaun Ministeri Saude, João Bosco da Costa, hateten mal nutrisaun mosu tanba kauza husi factores oi-oin.
“Hanesan kiak, edukasaun minimu, la asesu bee moos no saneamentu inklui falta aihan iha uma laran,” nia hateten.
Tanba ne’e, nia dehan, atu resolve problema ida ne’e presiza setor hotu nia kontribuisaun hodi kombate mal nutrisaun iha rai laran.
Ho esforsu maka’as ne’ebe Ministeriu Saude halo, nia dehan, liu husi intervensaun fahe batar uut no vitamina ba inan isin rua, inan fo susu inklui mos labarik sira iha tinan tolu nia laran konsege redus ba 52% iha 2013, iha 2010 mal nutrisaun iha Timor –Leste ho 85%.
Nia informa, ministeriu trasa ona planu estrategiku ba nutrisaun no sei estabelese ekipa iha nivel distritu no sub-distritu atu habelar informasaun kona ba importansia nutrisaun ba labarik sira no inan isin rua sira.
Iha parte seluk, Komisaria Komisaun Nasional Direitu Labarik, Maria Barreto, sente preokupa ho situasaun ida ne’e, tanba kuaze metade husi labarik iha Timor –Leste ho kondisaun mal nutrisaun.
Nia hatutan, labarik iha direitu atu hetan hahan ne’ebe iha nutrisaun diak hodi asegura sira nia dezenvolvementu fisiku no intelektual.
“Ita so falta komprensaun kona ba aihan ne’ebe ita nia rasik tuir lolos nia nutrisaun diak liu ba ita nia saude, tanba organiku liu duke hahan sira iha loja,” Komisaria KNDL ne’e hateten.
Iha parte seluk, Diretora organizasaun Hamutuk Ita Ajuda Malu (HIAM) Health (HH), Rosaria Martins da Cruz, hateten kazu mal nutrisaun iha Timor –Leste kontinua as no laiha mudansas husi tinan ba tinan.
“Hau la hatene peskiza ida ne’e oinsa tan, tanba hau la involve, maibe realidade pasiente mal nutrisaun iha sentru rehabilitasaun HIAM Health ne’eba barak los,” nia dehan.
