Diretora organizasaun Hamutuk Ita Ajuda Malu (HIAM) Health (HH), Rosaria Martins da Cruz, hateten kria to’os uma hun ne’e fo aktividade ba inan feto sira, alende haree ba oan sira no servisu seluk iha uma laran.
Ne’ebe nia dehan, programa to’os uma hun ne’e la’os deit fo servisu ba inan feto sira ne’ebe iha uma, maibe bele mos supporta aihan ne’ebe iha nutrisaun ba iha dapur no bele redus gastu dapur kada loron.
“To’os uma hun ne’e ho objetivu atu prevene mal nutrisaun, hadia dapur laran no fo servisu ba inan feto sira atu sira labele hein iha uma ho oan sira, sira mos tenke iha aktividade seluk,” Diretora da Cruz hateten, iha Ermera.
Tanba ne’e nia dehan, aktividades ne’e positive tebes ba inan feto sira ne’ebe hela iha uma no bele kontribui ba iha redusaun problema violensia domestika, e mos bele hamenus problema konta istoria husi uma ba uma.
Nia hatutan, durante tinan 2010-2014 sira apoiu ona familia hamutuk 14 hodi implementa programa to’os familia iha distritu Dili, Liquisa, Ermera, Manatuto, Baucau, Viqueque no Aileu liu –liu familia pasiente malnutrisaun sira ne’ebe durante ne’e halo rehabilitasaun iha sentru rehabilitasaun HIAM Health.
Iha parte seluk, Rosa Soares, hanesan benefisiario rekonese funsaun to’os uma hun ne’e ajuda tebes familia, liu –liu gastu dapur lor-loron nian no osan ne’ebe iha investe fali iha oan sira nia eskola.
Nia haktuir, to’os uma hun ne’e fo duni servisu ba inan feto sira ne’ebe iha uma atu hanorin oan sira kona ba valor nutrisaun husi aihoris sira ne’ebe iha ba saude.
“Antes ne’e ami la hatene, maibe bainhira ami tuir formasaun iha ne’e ami komprende ona funsaun husi to’os uma hun ne’e diak liu duke kuda aifunan ne’ebe la fo vantagen ba ita,” nia dehan.
Entretantu Matilde da Silva, hanesan benefisiaria sente kontente bainhira hola parte iha invairomentu HIAM Health nian, ho programa ne’e aumenta sira nia konesementu oinsa mak aproveita rai mamuk iha sira nia uma hun.
“Uluk hau hanoin uma hun sira ne’e kuda aifunan hodi ema haree furak, maibe bainhira hau mai iha sentru haree uma ninin sira inklui mos masa aifunan nian sira kuda hotu modo ba ne’e buat ne’ebe diak tebes presiza dezenvolve,” nia hateten.
