Komunidade suku tolu iha sub-distritu Laclo, distritu Manatuto durante tinan 13 ona la asesu ba bee moos no durante ne’e sira consume deit bee mota ba nesesidade loron-loron nian.
Xefe Suku Laku Mesak, Sergio Raimundo Perreira, hateten kestaun ne’e sira hato’o bebeik ona ba nivel distrital no nasional, maibe to’o agora laiha rezultadu.
“Sira tenke ba kuru bee iha mota ho distansi kilometru rua, ne’e susar tebes,” Xefe suku Perreira hateten, iha Laclo.
Nia hatutan, suku tolu ne’e kompostu husi suku Uma Naruk, suku Laku Mesak no suku Uma Kaduak.
Hatan ba kestaun ne’e reprezentante Administrador sub-distritu Laclo, Jacinto dos Santos, rekonese katak iha sub-distritu Laclo’o iha duni suku balun mak asesu ona ba bee moos, maibe balun seidauk.
Ba sira ne’ebe to’o agora seidauk asesu ba bee moos ne’e, nia dehan, tanba sira nia hela fatin mak iha foho leten liu, entaun bee matan laiha, nune’e sira tenke ba konsume bee mota.
“Maibe iha tempu badak sei iha solusaun ba ida ne’e,” nia hateten.
