Sekretariadu Estadu ba Promosaun Igualdade (SEPI) koopera ho Ministeriu asuntu Feto no Labarik Indonezia nian, fo formasaun ba grupus feto iha area rural kona ba produs kripik ho budu tasi no jus hudi, sabraka inklui mos marmelada.
Sekretaria Estadu Idelta Maria Rodrigues, hateten kooperasaun ida ne’e atu eleva grupus feto sira nia kapasidade, enkoraja sira halo kreatividades hodi hakbi’it ekonomia uma laran.
“Hau sei entrega grupu sira ne’e ba iha Ministeriu Komersio Industria no Ambiente, atu kontinua ba iha merkadu, e ami kapasita deit atu aktividade sira ne’e kontinua iha future,” Rodrigues hateten, iha Dili.
Nia haktuir, aktividades ida ne’e mos faz parte ida kontribui hodi redus volume violensia uma laran, tanba dalabarak violensia akontese tanba ekonomi uma laran fraku.
Nia hatutan, feto sira ohin loron hatudu duni sira nia kreatividades no komitmentu, maske ho fundus ki’ik no tempu ne’ebe limitadu, durante semana rua sira hatudu duni rezultado ne’ebe positive tebes.
Durante ne’e, nia dehan, grupus feto sira produs ona produsaun barak, hanesan halo kripik budu tasi, jus sabraka, hudi no seluk tan marmelada ne’ebe oras ne’e fa’an ona iha supermerkadu iha Dili laran.
Treinador ba formasaun ida ne’e, nia hateten, mai husi Indonezia no partisipa husi grupo produs jus sabraka iha Aileu, jus banana husi Natarbora Distritu Manatuto, kripik husi Atauro no Marmelada husi Lautem Mehara.
Iha parte seluk, Sekretariu Estadu ba Industria no Kooperativa, Filipus “Nino” Pereira, hateten sira simu ona naran grupu feto produsaun jus sabraka ho marmelada husi SEPI, maibe sei halo verifikasaun ba sira nia atividades.
Nia hatutan, atu garante sustentabilidade produsaun sira ne’e hotu, presiza halo verifikasaun ida ne’ebe klean.
“Tanba ami iha esperiensia grupu balun hatama proposta, maibe la eziste,” SE Nino hateten.
