Programa merenda eskolar ne’ebe kuaze fulan hat resin ona, tanba transferensia osan ba programa ne’e ba eskola sira tarde liu.
Prezidente Komisaun F (edukasaun,saude,kultura,veteranus no igualdade jeneru), Deputadu Virgilio da Costa Hornai, hateten programa merenda eskolar paradu desde kedas fulan Marsu to’o agora.
“Merenda eskolar iha fulan Janeiru to’o Fevereiru ne’e uja deit orsamentu tinan kotuk nian (2013),” Deputadu Hornai hateten, iha Parlamentu Nasional.
Alende ne’e, nia dehan, programa merenda eskolar paradu tanba hatama relatoriu husi kada eskolas ba Ministeriu Edukasaun tarde mos no komplikadu.
“Entaun fo impaktu ba prosesu merenda eskolar,” nia dehan.
Razaun hanesan hato’o mos husi Diretor Jeral Servisu Kooperativo, Antoninho Pires, katak merenda eskolar paradu, tanba orsamentu tama tarde.
“Ami sei esforsu an para semana ida ne’e merenda eskolar la’o fali hanesan uluk, tanba Ministeriu Finansas aloka ona osan ba iha eskola ensinu baziku no ensinu superior sira,” nia dehan.
Orsamentu ba programa ne’e dadaun iha ona konta bankaria, maibe total hira, nia dehan, seidauk hatene, depende ba total alunus iha kada eskola.
