Membru Parlamentu Nasional konsidera governu laiha kapasidade atu rezolve problema falsifikasaun dokumentus veteranus nian ne’ebe durante ne’e nunka rezolvidu.
Deputadu Eladio Faculto, hateten tinan barak ona problema ne’e akontese, maibe nunka hetan nia solusaun e governu fo kulpa deit ba ema ne’ebe ba foti dadus iha baze.
“Laiha medida solusaun ba problema ne’e, katak laiha kapasidade atu rezolve problema,” Deputadu Faculto hateten, iha Parlamentu Nasional. “Politikamente ne’e faila ona,”.
Nia dehan, konfuzaun bo’ot liu mak, kada tinan numeru veteranus aumenta, la’os menus.
Tanba ne’e, nia sujere ba governu tenke halo reavaliasaun kona ba asuntu ida ne’e, depois buka solusaun alternative.
Entretantu hatan ba kestaun ne’e Sekretariadu Estadu Kombatentes ba Libertasaun Nasional (SEKLN), Julio Sarmento da Costa alias Metan Malik, katak problema ne’e komplikadu tebes no la fasil atu resolve.
“Tanba ita selu malu iha kotuk, entaun veteranus sira mos sai buradu hotu, fo dalan ba ema seluk hodi sai simu osan, la familia martires mos sai familia martires, la’os oan ba martires mos sai oan ba martires,” SE Malik hateten.
Tuir nia, rezolve problemas falsifika dokumentus veteranus ne’e tenke honestu.
“Hau mai nudar secretariu estadu individu ida, ne’ebe tuur iha leten, mais ema iha kraik ne’eba falsifika dokumentus hodi tulun malu, hau labele halo buat ida,” nia hateten.
Tanba ne’e, nia husu, ba Membru Parlamentu (MP) labele koalia deit, maibe kontribui ba malu, tanba problema veteranus la’os problema secretariadu estadu asuntu vetenarus nian deit.
“Ita hotu kontribui ba malu hodi ajuda resolve kestaun ne’e,” SE Malik husu.
Nia hateten, total veteranus ne’ebe agora dadaun simu ona subsidiu ne’e hamutuk 18 mil resin ona.
