Atu feto potensial sira nivel distrital sira bele kompete iha eleisaun Kamara Munisipal, Sekretariadu Promosaun Igualdade (SEPI), aloka $10,000 ba kada distritu hodi prepara sira nia an.
Sekretaria Estadu, Idelta Maria Rodrigues, hateten osan ne’e husi fundus transferensia SEPI 2014 nian, apoia feto potensial iha nivel rural realiza kongresu distrital kria estatutu no rejimentu ne’ebe sai mahon no lian ba feto sira.
Nia rekonese katak partisipasaun feto iha vida politika nivel nasional as tebes, maibe iha nivel distrital sei menus liu.
“Ita nia feto maluk sira nia partisipasaun iha nivel komunitario iha deit 2%,” SE Rodirgues hateten, iha Kaikoli, Dili.
Entretantu Prezidente Grupu Feto Parlamentar, Deputada Josefa Alvares Pereira Soares, hateten partisipasaun feto iha nivel distrital no sukus sei menus, tanba la hetan oportunidade.
“Iha kargu politika sira, hanesan iha divizaun ne’e ema ladun fo importansia ba feto sira nia partisipasaun,” Deputada Soares hateten.
Tuir nia, ida ne’e hanesan diskriminasaun ida ba feto iha nivel local, tanba ne’e tenke influensia nafatin atu halakon tiha erru ida ne’e.
Entretantu, reprezenta feto potensial distritu Aileu, Cristina Guterres, hateten feto potensial distritu Aileu dadaun ne’e halibur malu ona hodi fo hanoin hamutuk kona ba kontribuisaun feto sira nian ba iha programa governu nian.
Nia hatutan, feto potensial distritu Aileu sira preparadu atu compete iha programa pre-deskonsentrasaun ne’ebe sei implementa iha tinan ne’e.
“Importante mak fo liman hamutuk hodi prepara an konkore ba iha munisipiu,” Guterres hateten.
