Lezada MB (fen) husu osan ba nia la’en (FDS) hodi sosa aimoruk ba sira nia oan ne’ebe moras hela, maibe tanba osan laiha arguidu FDS ho nervozu baku tiha lezada.
Tuir akuzasaun husi Ministeriu Publiku (MP) ne’ebe lee sai husi juis prezidente iha tribunal, katak iha 20 Novembru 2013, lezada MB husu osan ba arguido hodi sosa aimoruk, maibe arguidu dada lezada nia fuuk no tuku tebe tiha.
Durante iha julgamentu, arguidu FDS hili nonok (la koalia), ho nune’e komprova katak akuzasaun MP ne’e loos hotu.
Tanba arguido hili atu nonok, Ministeriu Publiku ne’ebe reprezenta husi Prokuradoria Lidia Soares, katak tuir lei numeru 7/2010, hatur katak violensia domestika ne’e krimi publiku.
Atu arguido labele repete tan aktu hanesan iha future, MP sujere ba tribunal atu aplika pena prizaun seis meses ba arguido.
Entretantu Advogadu Ruben Maia, hateten tuir nia observasaun arguido la halo ona aktu violensia ba nia kaben, tanba depois de akontesementu ne’e sira hela hamutuk.
Advogadu mos hatuir tan katak arguido mos servisu hanesan seguransa, ne’e duni sei kuandu tama kadei see mak sei subtenta familia.
Nune’e husi parte defeza husu atu aplika pena suspensaun ba arguido, no wainhira arguido repete fila fali aktu ne’e, sei tama direitamente ba kadeia.
Depois de rona deklarasaun hirak ne’e, juis president aplika pena suspensaun ba arguido, no husu atu lalebe repete tan aktu ne’e iha futuru.
