Reprezentante Koligasaun Direitu Labarik, Honorio Almeida, konsidera sistema asistensia legal ba labarik ho kazu iha problema bo’ot, tanba maioria husi sira ne’ebe hela iha prizaun, la konese no lahatene sira nia advogado. 
Nia hateten, tuir lei labarik ne’ebe konflitu ho lei tenke hetan atensaun urgente no espesial ba iha prosesu legal, maibe durante ne’e kazu barak mak prosesu kleur hodi hetan desizaun ikus iha tribunal.
“Tuir lolos sira tenke hetan akompanhamentu masimu husi advogadu, maibe ida ne’e la akontese,”nia preokupa.
Nia hatutan, labarik sira iha direitu atu hatene sira nia prosesu kazu to’o iha ne’ebe, nune’e sir abele hela iha serteza nia laran.
Tanba ne’e, nia dehan, linha koordenasaun ba servisu justisa juvenil presiza hametin liu tan, atu labarik sira mos bele hetan akompanhamentu ne’ebe dignu husi prosesu legal.
“Tenke hadia mekanismu linha koordenasaun entre komponente hotu ne’ebe servisu iha justisa juvenile, ne’e importante atu asegura labarik ne’ebe konflitu ho lei,” nia hateten.
Enkuantu total labarik ne’ebe konflitu ho lei ne’ebe hela sela prizaun Becora oras ne’e dadaun hamutuk nain 24.
Husi numeru ne’e, nia hateten, iha nain hat mak nia kazu hetan ona desizaun final iha tribunal ho responsabilidade pena prizaun ne’ebe la hanesan, tanba komete kazu ne’ebe diferente.
“Balun involve krime omesidio, violasaun seksual, abuzu seksual, pekulatu ga na’ok no seluk tan,” nia hateten.
Iha parte seluk Vise Ministru Justisa, Ivo Jorge Valente, rekonese kestaun ne’e e ida ne’e akontese tanba numeru defensor publiku limitadu tebes atu atende prizoneiru hotu.
Maibe, nia dehan, durante ne’e defensor sira hala’o ona sira nia funsaun ho diak, fo asistensia legal ba prizoneirus sira.
“Ita iha 17 pesoas deit hamutuk ho estajiario balun hamutuk nain 22, enkuantu numeru prizoneiru sira iha Prizaun Becora no Gleno sa’e nafatin,” Vise Ministru Valente hateten.
Nia hatutan, prizoneiru balun la konese sira nia defensor, tanba faktor oi-oin, balun prizoneirus rasik laiha interese atu kontaktu sira nia defensor, ida seluk tempu ne’ebe limitadu no servisu barak.
“Entaun sira labele konese malu diak liu entre defensor ho klientes,” nia katak.
