Vise Ministru Justisa, Ivo Jorge Valente, hateten governu identifika ona rai iha Tibar hodi harii sentru rehabilitasaun ba labarik sira ne’ebe konflitu ho lei, nune’e labele kahur ho prizoneiru adultu sira iha Prizaun Becora. 
Nia haktuir, projetu ida ne’e kategoria projetu bo’ot, tanba ne’e sei halo koordenasaun ho Ajensia Dezenvolvimentu Nasional (ADN) atu haree nia dezenu.
Nia hatutan, tinan ida ne’e governu tau orsamentu ho montante $500,000 atu halo dezenu no konstrusaun sei hala’o iha tinan oin.
“Rai fisku ona, agora hein deit halo dezenu, se tinan ida ne’e konsege dezenu hotu, tinan oin ita hahu halo konstrusaun,” Vise Ministru Valente hateten, iha nia servisu fatin Colmera, Dili.
Nia informa, katak objetivu harii sentru rehabilitasaun ne’e atu haketak prizoneiru minoridade sira husi invairomentu prizoneiru adultu nian atu ne’e bele fo atensaun ne’ebe masimu ba sira intermus formasaun profesional, edukasaun moral no seluk tan.
Iha parte seluk, Koordenador Programa Protesaun ba Labarik Forum Tau Matan (FTM), Honorio Almeida, hateten dever governu atu kria kondisaun hodi fo protesaun ba labarik sira tanba estado ratifika ona konvensaun internasional direitu labarik.
Nia hatutan iha esbosu lei justisa juvenil ne’ebe oras ne’e dadaun sei iha Konseilho Ministru mos iha artigu balun fo dalan ba governu atu dezenvolve sentru rehabilitasaun no sentru alternative ne’ebe sei responsabilizia husi Ministerio Solidaridade Sosial atu tau matan ba labarik sira ne’ebe iha risku.
“Fatin rua ne’e importante ba labarik sira ne’ebe konflitu ho lei atu sira labele hela hamutuk ho ema adultu sira iha prizaun Becora maibe iha ona fatin ida ba sira atu sira bele hetan tratamentu ne’ebe digno hanesan labarik,” dehan Almeida.
