Diretora Hamutuk Ita Ajuda Malu (HIAM) Health, Rosaria Martins da Cruz, hateten estensionista sira presiza iha konesementu diak kona ba valor nutrisaun, no edukasaun importante tebes ba sira, nune’e bele fahe ba komunidades.
Nia haktuir, estensionista sira presiza iha konesementu kona ba tipu aihoris sira ne’ebe iha valor nutrisaun as ba ema nia saude, atu nune’e bele mobiliza komunidade sira kuda aihoris sira ne’e hodi kontribui ba prevene malnutrisaun iha rai laran.
Tanba ne’e, nia dehan, HIAM Health (HH) iha ona planu atu kapasita estensionista sira kona ba nutrisaun nian no sei komesa uluk iha distritu Ermera iha fulan Junu.
“Ami sei lori sira ba tuir treinamentu durante loron lima kona ba agrikultura nian no mos nutrisaun, tanba kuandu ita hanorin ema kona ba agrikultura konserteza la ses husi nutrisaun mos,” Diretora da Cruz hateten, iha salaun administrasaun Distritu Ermera.
Iha fatin hanesan, Xefe Suku Lemia Leten, Jose Araujo, rekomenda ba HIAM Health atu apoiu nafatin informasaun ba extensionista sira iha distritu Ermera, nune’e bele eduka fali povu sira hodi prevene sira nia familia husi malnutrisaun.
“Ami husu nafatin ba ita bo’ot sira atu apoiu extensionista sira hodi eduka komunidade sira prevene sira nia familia husi malnutrisaun,” nia sujere.
Entretantu, estensionista Eugenia de Araujo, agradese ba HIAM Health ne’ebe iha hanoin atu kapasita sira, espesifiku kona ba nutrisaun nian, tanba durante ne’e sira seidauk hetan formasaun espesifiku ba nutrisaun.
“Agradese, tanba ami rasik la hatene aihoris sira ne’ebe iha nutrisaun as ba ema nia saude no kada aihoris sira ne’e kontamina vitamina saida,” nia hateten.
“Ami so hatene deit parte agrikultura nian uja sistema modernu,”.
