Membru Parlamentu Nasional kestiona maka’as pesoal saude kontinua loke klinika privadu iha Sentru Saude Lospalos, ida ne’e fo impaktu ba sira atu fo asistensia saude ba pasientes ho diak.
Deputada Albina Marçal Freitas, hateten problema ne’e hato’o ona ba iha Ministru Saude iha tinan kotuk, maibe to’o agora seidauk iha intervensaun.
Maske la bandu, maibe nia dehan, nudar funsionario publiku iha dever atu fo atendimentu ba komunidade sira, la’os abandona pasiente ba fali fa’an aimoruk.
“Ministru tenke halo despaisu imediata ba pesoal saude ne’e labele fa’an aimoruk iha complex sentru saude,tanba dalaruma sira fa’an iha oras servisu nian,” Deputada Freitas hateten.
Iha fatin hanesan, Diretor Saude Distritu Lautem, Julio Pereira, rekonese kestaun ne’e, maibe la’os pesoal saude nian, ema seluk nian.
“Apotik ne’e la’os parteira ne’e ninian, maibe nia alin nian,” nia hateten.
Maske parte sentru saude seidauk halo intervensaun, maibe nia dehan, fo hanoin ona ba pesoal saude ne’e, katak aktividades ida ne’e kontra lei funsaun publika nian.
“Parteira ne’e promete ona, sei sai husi fatin ne’eba iha fulan Maio agora,” Diretor Pereira hateten.
Nia hatutan, parteira ne’e hela iha fatin ne’e desde kedas okupasaun Indonezia nia tempu to’o agora.
Hatan ba kestaun ne’e Ministru Saude, Sergio da Costa Lobo, promete sei hasai despaisu ida hodi hasai pesoal ne’e iha komplex ne’eba.
Kona ba negosiu, nia dehan, sei koordena ho funsaun publika atu haree ba pesoal saude ne’e, tanba iha lei funsaun publika bandu funsionario involve iha negosiu.
“Iha tempu badak ami sei hasai despaisu atu proibi funsionario hotu labele involve iha negosiu,” Ministru Lobo hateten.
