Iha tinan 2014 ne’e Universidade Nasional Timor Lorosa’e (UNTL) fo bolsu estudu ba estudantes nain 43 ba estudu iha Portugal.
Reitor UNTL, Aurelio Guterres, programa la’o tinan-tinan hodi haruka estudantes ba estudu iha liur, tanba kooperasaun entre UNTL ho Uniaun Europeia no programa ne’e la’o tinan-tinan.
“Tinan ne’e ami fo bolsu estudu 43 tan, kontinua fo konvite ba sira para sira mos reforsa lingua Portuguesa wainhira sira ba eskola iha Portugal,” Reitor Guterres hateten, iha Parlamentu Nasional .
Programa bolsu estudu ne’e rasik, nia dehan, hahu la’o iha tinan 2012 to’o agora , e tama tinan tolu ona programa ne’e la’o.
“Tinan-tinan provolta ema nain 40 ba eskola iha Portugal no Fiji,” nia hateten.
Nia dehan, bolsu estudu ida ne’e la’os deit ba UNTL, maibe konvida mos husi eskola privadu sira atu tuir. Bolseiru sira obrigatoriamente tenke tuir kursu metodologia ensinu no mos kursu oinsa atu hakerek artigu sientifiku.
Iha fatin hanesan ,Vise Ministru Edukasaun Ensinu Superior, Marcal Avelino informa, lingua Portugues la’os bolsu estudu deit , maibe Institutu Camoes no Brazil mos suporta fo kursu lian Portugues baziku ba estudante no dosentes UNTL.
Nia hateten, sira ne’e tuir kursu lian Portugues durante ne’e mak hanesan estudantes no dosentes husi Dili Institute of Tecnology (DIT), fasilita kursu Portugues baziku um (1), baziku dois (2) no tres (3), depois mak kontinua ba intermediate.
“Ita nia tarjetu ba tres anos no kuatru anos mai, teze tenki halo duni ho lian Portugues, tanba lingua sientifiku diferente ho lingua bai-bain,” Avelino hateten.
