Reprezentante Conselho Nasional Joventude Distritu Ainaro, Felisberto Assis Pereira ejiji ba Sekretario Estado Joventude e Desportu (SEJD) atu estabelese sede conselho, nune’e bele halibur joventude iha distritu ne’e hodi kria aktividades jovens nian.
Maske, nia dehan, bele halo kongresu bar-barak no simu atributu oi-oin, maibe servisu hotu sei la la’o, bainhira laiha fatin ida atu halibur malu hodi soe ideas hamutuk kria buat ruma iha distritu laran.
Nia dehan, papel konselho joventude ne’e importante tebes ba nasaun ida ne’e, tanba nasaun ne’e hamrik ho sakrifisiu bo’ot ida husi joventude.
“Maibe sede ba konselho joventude deit mos laiha,” nia preokupa.
Tuir nia, membru konselho joventude iha distritu Ainaro ne’e uniku, tanba membru sira mai husi organizasaun arte marsiais sira, maibe fatin mak laiha.
Iha parte seluk, reprezentante Konselho Nasional Joventude Timor –Leste (CNJTL), João do Nascimento, hateten sira seidauk simu informasaun ida ne’e no husu atu hato’o ba iha Prezidente CNJTL hodi buka solusaun.
“Hau la hatene, tanba iha koordenador ida uluk ne’e sira iha sede, agora dehan laiha,” reprezentante CNJTL ne’e hateten.
Nia mos husu ba konselho joventude distritus, tenke sai autonomo iha sira nia distritu hodi servisu hamutuk ho NGO local sira, emprezario local sira hodi buka fundus ba programa sira ne’ebe sira planea hodi kontribui ba dezenvolvimentu.
“Labele dependente ba iha nasional deit, tanba nasional rasik susar atu atende sira nia nesesidades,” nia sujere.
