Membru Parlamentu Nasional preokupa tebes ho kondisaun profesores kontratadus sira iha rai laran, tanba sira la simu salariu fulan rua ona.
“Sira ejiji tanba, sira selebra ona kontratu ho ministeriu edukasaun, maibe fulan rua ona sira la simu salariu,” Deputadu Virgilio da Costa Hornai kestiona, iha Parlamentu Nasional.
Prezidente Komisaun F (edukasuan, saude, kultura, veteranus no igualdade jeneru), ne’e sujere ba governu tenke fo salariu mensal ba profesor kontratadu sira ne’e, tanba ne’e sira nia direitu.
Iha fatin hanesan Deputadu Paulino Monteiro, hateten profesores voluntariu balun hanorin ona durante tinan neen nia laran, maibe to’o agora Ministeriu Edukasaun seidauk fo kontratu ba sira.
“Tanba ne’e hau husu ministru fo atensaun nafatin ba ida ne’e,” Deputadu Monteiro sujere.
Hatan ba kestaun ne’e Ministru Edukasaun, Bendito Freitas, katak ministeriu halo ona esforsu imediatu atu fo kontratu ba profesor voluntariu nain 4220 iha rai laran.
“Ami haruka ona karta koordenasaun ho Komisaun Funsaun Publika atu prosesa, nune’e sira bele hetan sira nia direitu lalais,” Ministru Freitas hateten.
Nia dehan, ME labele prosesa mesak, prosedimentu administrativa tenke liu husi Komisaun Funsaun Publika (KFP), tanba orsamentu alokadu tama iha salariu vensimentu.
“Ami horseik mos diskuti hela atu prepara hamutuk ho Komisaun Funsaun Publika atu aselera prosesu ida ne’e,” nia hato’o.
