Ministru Saude, Sergio da Costa Lobo, promete sei hadia sistema atendementu transferensia pasiente husi distritu mai iha Ospital Nasional Guido Valadares (HNGV), hodi prepara kondisaun ne’ebe diak ba sira nia familias ne’ebe akompanha sira.
Ministru Lobo, rekonese katak durante ne’e governu so kria deit kondisaun ba familias pasientes ne’ebe halo transferensia ba rai liur, enkuantu iha rai laran seidauk.
“Sira ba liur ne’e ita fo tiket aviaun, perdiem no buat hotu-hotu, maibe sira referral mai iha Dili ne’ebarak, mas ita la urus ida, ambulansia lori tiha mai, depois la hatene nia familia sira ne’e ba toba no han iha ne’ebe,” Ministru Lobo hateten, iha Parlamentu Nasional.
Nia hatutan, orsamentu jeral do estado 2014 espesifiku halo referral pasiente ba liur inklui mos kria kooperasaun ho ospital sira iha liur, hanesan ospital iha Singapor ho Malaysia atu estabelese unidade kardiologia iha Timor-Leste inklui hadia sistema referral iha rai laran.
Iha parte seluk, Membru Komisaun F (saude,edukasaun, kultura, veteranus no igualdade jeneru), Deputadu Eladio Faculto, hateten ne’e obrigasaun governu nian fo atendementu saude ne’ebe igual ba ema hotu tuir Konstituisaun da Republika haruka.
Deputadu ne’e rekonese, katak durante ne’e Ministerio Saude fo liu atensaun ba pasiente no familia pasiente sira ne’ebe halo referral ba liur duke husi distritu mai iha nasional.
“Hau nia hanoin ministerio tenke hare ida ne’e no kumpri saida mak hakerek iha konstituisaun da republika laran ema hotu iha direitu atu hetan atendementu saude ho gratuitu,” Faculto hateten.
