Fen-la’en ho inisial PB no LG tenke lori malu ba to’o iha tribunal, tanba haksesuk malu ba oan nain tolu ne’ebe sira iha.
Tuir deklarasaun vitima PB (fen), iha Tribunal Distrital Dili (TDD), katak iha momentu ne’eba kuaze tuku 10 kalan, vitima husu arguido LG (la’en) atu ba foho hodi haree nia inan aman lori ho oan nain tolu.
Maibe vitima deklara, arguido lakohi vitima lori ho labarik nian tolu no husik vitima ba mesak deit.
“Hau la hatene, tanba saida mak nia hanesan ne’e,” vitima PB deklara iha TDD, Dili.
PB deklara tan, katak iha momentu ne’eba tuku lima dadersan, vitima atu ba foho hein hela bis iha Halilaran lori ho sira nia oan ikun (foin tinan rua), derepente arguido tuir sira no hadau tiha oan ikun.
“Hau haksesuk malu ho nia, depois nia basa hau no tebe hau nia ain,” vitima deklara ho triste.
Maske nune’e, vitima konsege ba duni foho sein lori oan, maibe wainhira to’o iha foho nia simu telephone husi arguido, katak vitima labele fila ona mai Dili.
“Maibe hau la preokupa, hau fila mai haree hau nia oan, maibe nia baku hau no tuda hau ho sasan kroat,’’ PB deklara.
Kazu ne’e rasik akontese iha Bairo-Pitte, iha dia 27 Maiu 2013. Durante prosesu ne’e la’o iha tribunal, vitima PB hela ho nia tiun iha Tuana laran no aproveita tempu haree oan sira bainhira arguido ba tiha ona servisu.
Entretantu arguido LG iha nia deklarasaun iha TDD, katak razaun nia la fo oan atu vitima lori ba foho, tanba bainhira vitima ba foho to’o fulan tolu ga lima mak foin fila ho labarik.
“Hau fo bebeik nia tempu ba foho, maibe hau la gosta ne’e tanba nia ba ona ne’e kleur maka fila,” arguido LG deklara.
Iha primeriu interogatoriu ne’e, Juis Prezidente Duarte Tilman, husu ba arguido atu simu fila-fali vitima ga la’e hodi moris hamutuk fali hanesan uluk, maibe arguido hatan bele simu, maibe fo tempu fulan ida atu rekopera kondisaun ne’e.
