Hafoin tinan ida estabelese, oras ne’e dadaun iha ona doutor nain neen mak fo atendementu saude ba pasientes iha Klinika Polisia Nasional Timor-Leste (PNTL).
Xefe Klinika PNTL, Inspektor Abilio de Araujo, hateten iha tinan kotuk klinika ne’e iha deit doutor nain rua, enfermeira nain rua, maibe agora iha ona doutor nain neen no enfermeira nain 12.
“Ne’ebe agora sei fo atendementu saude diak liu tan kompara ho tinan kotuk liu ba,” Xefe Klinika PNTL ne’e hateten, iha Kaikolil, Dili.
Doutor nain neen ne’e, nia dehan, hasai sira nia lisensiatura doutor nian iha Cuba e sira nain neen ne’e foin mak mai.
Doutor nain neen ne’e, nia hatutan, ba halo mos tratamentu iha Sentru Akademia Polisia, liu-liu polisia foun sira ne’ebe halo ezersisiu, karik moras, bele ajuda sira.
“Iha doutor ida maka hau delega ba iha ne’eba,” Xefe Klinika PNTL ne’e dehan.
Entretantu Deputada Albina Marcal Freitas, hateten ne’e progresu ne’ebe diak no bele fo tratamentu ne’ebe ho masimu liu tan ba iha membru PNTL sira ne’ebe moras.
“Ne’ebe aumenta doutor, enfermeira no aimoruk iha klinika ne’e importante,” Deputada Freitas apoia.
Tuir nia, klinika ne’e la’os fo deit atendementu ba membrus polisia maibe mos sira nia familias ne’ebe moras, tanba ne’e stok aimoruk tenke sufsiente inklui medikus.
