Membru Parlamentu Nasional lamentavel ho attitude Administrador sub-distritu Vemasse, distritu Baucau Tomas Freitas, tanba fos ne’ebe lolos atu fahe ba vitima dezastre naturais iha fatin ne’eba, maibe nia fa’an fali ho $15 kada saka.
Deputada Brigida Coreia, hateten nia simu informasaun ida ne’e direitamente husi Xefe Suku Uato-Lari no komunidade sira husi suku Uai-Gae.
“Sira informa mai, katak administrador sub-distritu Vemasse ba fa’an fos uja ho kareta estadu iha tempu kalan ho presu 15 dolares,” Deputada Coreia kestiona, iha Parlamentu Nasional.
Deputada ne’e hateten, fos apoia husi Ministeriu Turismu Komersiu Industria no Koperativa (MKIA), tanba lori xefe suku nia naran mak husu ajuda ba ministeriu atu halo atendementu ba komunidade .
“Hau hanoin ida ne’e politika ne’ebe la los, hau hetan informasaun katak agora dadauk fos balun iha komunidade Loi-Lubu nia uma(komunidade partidu balun nia uma)no mos nia uma rasik nia rai hela fos saka hira ne’eba,” Deputada Correia hateten.
Nia konsidera, hahalok administrador sub-distritu ne’e halo abuzu de poder, tanba ne’e husu ba MKIA atu halo investigasaun ba administrador no fo sansaun ba nia.
“Abuju poder ne’e tanba uja kareta estadu, fa’an fos no foti fatuk ba kompania balun nian iha ne’eba, uja kareta estadu tula hare, tula bebak, ida ne’e hau senti katak ladun diak,” nia hateten.
Entretantu Deputadu Manuel Castro, hateten Polisia halo ona investigasaun ba administrador sub-distritu Vemasse.
“Horiseik hau hasoru nia, depois hau fila to’o iha Dili nia telefone tuir hau, dehan nia hetan despaisu husi ministeriu komersiu rasik,” Deputadu Castro dehan.
Deputadu husi bankada Fretilin ne’e informa, katak Administrador sub-distritu Vemasse ne’e hetan fos husi MKIA 1300 sakas.
“Nia rai iha Uatu-Lari 76 sakas, iha Lui-Lubu 96 sakas no iha Uai-Gae 92 sakas,” nia hateten.
Informasaun ne’ebe mak deputadu ne’e simu husi admistrador ne’e, katak nia foti primeira faze iha 676 sakas no segunda faze 520 sakas.
Deputadu ne’e dehan fos ne’ebe admistrador ne’e fa’an ba komunidade sira la iha kordenasaun ho sefe suku no sefe aldeia sira.
“Hau rona husi sefi suku sira katak nia halo profosal maibe bazeia ba xefe suku nain hitu nia naran mak hodi mai ,”nia hateten.
