Komisaun F Parlamentu Nasional apresia ho politika Ministeriu Edukasuan (ME) nian, kolabora ho sosiedade sivil kontrola ba implementasaun programa merenda eskolar iha tinan ida ne’e.
Membru Komisaun F (edukasaun, saude, kultura, veteranus no igualdade jeneru), Deputadu Antonio Ximenes Serpa, hateten ME tenke servisu ho sosiedade sivil, nune’e bele jere didiak osan ne’ebe iha.
“Jere didiak osan ida ne’e para fo han ba labarik sira,” Deputadu Serpa hateten, iha Parlamentu Nasional.
Deputadu husi bankada Congreu Nasional Rekonstrusuan de Timor (CNRT) ne’e, dehan orsamentu ba programa merenda eskolar ba tinan ne’e provolta $26 miloens no kada estudantes $0,25.
Maske nune’e, nia dehan, tuir informasaun ne’ebe nia simu husi estudantes, katak programa merenda eskolar kontinua la’o ladun diak.
“La kleur tan ami Komisaun F hatama tan proposta ba Parlamentu Nasional atu ba fiskaliza,” nia dehan.
Iha sorin seluk Deputadu Agostinho Lay, hateten ME iha diresaun asaun eskolar ne’ebe sei toma atensaun ba programa ne’e.
Fos ba merenda eskolar, nia dehan, dalaruma la to’o iha eskola sira iha area rurais tanba udan, estrada at entaun fos tau deit iha vila.
“Dala ruma haruka fali alunus no inan aman sira mak mai lalin fali, ne’e mak atraza,” Deputadu Lay dehan.
Atu programa ne’e la’o ho diak, nia dehan, aliened ME, diretor da eskola inklui inan aman estudantes tenke kontrola mos.
Iha sorin seluk Program Manager Timor-Leste Coalition for Education (TLCE), Matias dos Santos, hateten involvementu sosiedade sivil ba implementasaun programa ne’e diak, nune’e bele iha mudansa.
“Ami halo kooperasaun ho Ministeriu Edukasaun, ami mos diriji ona karta ba sira para loke dalan ba ami nia rede sira iha distritu bele halo monitorizasaun,” nia hateten.
