Durante fulan rua (Janeiru no Fevereiru 2014) nia laran, kazu krimi hamutuk 513 (husi 13 distritus) mak konsege rejistu iha Servisu Investigasaun Kriminal nian.
Diretor Servisu Investigasaun Kriminal (SIK), Superintendente Calisto Gonzaga, hateten kazu krimi ne’ebe rejistu durante fulan Janeiru hamutuk 249 no Fevereiru iha 264 kazus.
“Barak liu mak krimi ofensas integridade fisika ho violensia domestika,” Diretor Gonzaga hateten, iha Kaikoli, Dili.
Kazus hirak ne’e, nia hateten, maioria mai husi distritu Dili, Oe-Cusse no distritu Bobonaro, enkuantu distritu Ainaro iha deit kazu tolu.
Entretantu tuir Deputada Josefa Alvares Soares, katak ne’e numeru ne’ebe bo’ot, tanba fulan rua deit kazu barak ona hanesan ne’e, to’o tinan ida ne’e barak liu tan.
“Presiza foti medidas hasoru buat sira ne’e, nune’e bele prevene krimi no minimize numeru kazu, ” Deputada Soares sujere.
Deputada husi bankada Fretilin ne’e, husu mos ba komunidade sira kualker problema ne’ebe akontese iha sira nia le’et tenke resolve ho ulun malirin.
“Tur hamutuk koalia ba malu, ne’e diak liu duke buka oho malu no baku malu, ne’e la rezolve problema maibe aumenta problemas,” nia sujere.
