Ministeriu Justisa (MJ) hahu hatama proposta iha NGO parseiru dezenvolvementu sira, buka fundus atu harii klinika judisiariu iha distritu 13 nia laran.
Ministru Justisa Dinisio Soares Babo, hateten foin lalais iha debate orsamentu jeral 2014 nian, ministeriu relata duni programa ne’e ba Parlamentu Nasional hodi hetan fundus, maibe la pasa.
“Tanba ne’e, agora dadaun dirasaun nasional direitus humanu nian, halo ona proposta atu hatama iha parseiru dezenvolvementu sira,” Ministru Babo hateten, iha Colmera, Dili.
Nia esplika, katak klinika judisiariu, hanesan fatin ida atu suporta no ajuda komunidade ne’ebe hakarak hatene kona ba lei ne’ebe vigor iha nasaun Timor-Leste.
Kuandu hetan ona fundus husi parseiru sira no programa komesa la’o ona, nia dehan, ministeriu sei husu fali osan iha estadu hodi hare ba programa ne’e nia kontinuasaun iha future.
“Ita la’o tiha maka ita haree, estadu bele fo osan ga la’e”, Ministru Babo hateten.
Iha parte seluk Prezidente Komisaun A (asuntu konstitusionais, justisa, administrasaun publika, poder local no anti korupsaun), Deputada Carmelita Moniz, apoia no konsidera programa ne’e kapaas.
Nia rekonese, katak iha orsamentu jeral ba 2014 nian ba programa ida ne’e laiha, maibe ministeriu bele buka alternative seluk, oinsa mak bele realize programa ida ne’e.
“Se kuandu la’o diak ona no hatudu progresu ne’ebe signifikativu, depois mak ita haree took atu aloka osan ba ida ne’e,” Prezidente Komisaun A Parlamentar ne’e hateten.
