Membru Parlamentu Nasional lamentavel tanba oras ne’e dadaun stok reajente iha fasilidades saude iha Dili laran laiha atu halo diagnostika ba moras dengue hodi halo intervensaun.
Deputada Bendita Magno, hateten moras dengue presiza halo diagnostika tanba moras ne’e fo perigu ba ema nia vida liu –liu labarik.
Tanba ne’e nia dehan, Ministerio Saude tenke resolve problema ne’e imediatamente ho osan ne’ebe aprova ona iha Parlamentu Nasional.
“Hau ba konsulta iha sentru saude, hau hasoru tia ida kous hela nia oan ne’ebe nia isin mean hotu ona, maibe pesoal saude sira haruka fali ba klinika privadu atu halo diagnostiku, tanba sentru saude laiha reajente,” Deputada Magno levanta, iha Parlamentu Nasional.
Entretantu Deputada Fernanda Lay, hateten epidemia moras dengue ne’e kazu ne’ebe seriu no edukasuan prevensaun importante tebes ba komunidade sira.
“La’os kazu barak ona iha ospital, foin hakfodak fahe informasaun,” nia hateten.
Deputada ne’e mos kestiaona programa limpeza jeral ne’ebe governu lansa kada sesta feira halao limpeza jeral maibe oras ne’e dadaun programa ne’e paradu lalao kauza mos ba moras dengue.
Iha parte seluk, Diretor Klinika Hospital Nasional Guido Valdares (HNGV), Dr. Aniceito Barreto hateten reazente iha HNGV mos laiha maibe iha klinika privadu sira iha tanba ne’e bainhira presiza urgent sira halo kompras iha klinika privadu sira.
Nia hatutan reazente atu halo diagnostiku konfirmadu ba moras dengue ne’ebe teste ona iha laboratorium tanba ne’e ladun importante liu.
“Oras ne’e dadaun reazente stok out hela maibe Ministerio Saude prepara hela atu hola husi estrangeirus iha ona dalan espera bele to’o mai atu supporta halo diagnostiku,”dehan Dr. Barreto.
Nia informa mos katak oras ne’e dadaun HNGV sei kontinua registu moras dengue ne’ebe balun sei baixa hela maibe nia numeru la barak hanesa iha fulan Dezembru no Janeiru liu ba.
