Membru Parlamentu Nasional preokupa maka’as kona ba implementasaun programa merenda eskolar iha eskola Ensino Baziku ne’ebe kontinua laiha kualidade (menu) maske governu hasa’e subsidiu ba programa ne’e. 
Deputadu Antonio dos Santos, hateten bainhira sira ba halo fiskalizasaun iha eskola ensino baziku distritu Ermera, deskobre katak sei uja fos ne’ebe tinan kotuk 2012 no 2013 nian ba merenda eskolar nian.
“Ita aprova osan $0,25 sentavus ba kada alunu nune’e bele hadia nutrisaun merenda eskolar nian, maibe iha ne’eba labarik han etu maran ho tahu ida,” Deputadu husi bankada Fretilin ne’e proekupa, iha Parlamentu Nasional.
Aleinde ne’e, nia dehan, kondisaun eskola ne’e mos ladun diak tanba livrus no fos tau hamutuk iha kuartu ida.
Tanba ne’e nia sujere ba Ministeriu Edukasaun, buka mekanismu ne’ebe diak hodi kontrola menu merenda eskolar nian.
Iha fatin hanesan Deputadu Agostinho Lay , hateten diak liu haruka fos ba eskola sira kada periodu haruka dala ida, atu nune’e fos labele hetan estragus.
“Tanba armajen edukasaun nian iha distritu ki’ik oan los, enkuantu fos ne’ebe ba ne’e toneladas, entaun barak mak at,” nia dehan.
Entretantu Koordenador Programa Timor-Leste Coalition for Education (TLCE), Matias dos Santos, hateten programa merenda eskolar durante ne’e eskola balun la’o maibe balun mos la la’o.
“Ami observa eskola sira iha Dili, mesmu orsamentu aprova tiha ona maibe iha fulan Janeiru to’o mai Fevereiru labarik sira han nafatin $0,15 sentavus nia folin,” Koordenador TLCE ne’e kestiona.
Nia fo ezemplu hanesan eskola Ensino Baziku numeru 09 Aimutin, Dili tama iha fulan Fevereiru programa merenda eskolar la la’o.
“Ida ne’e tanba jestaun ba merenda eskolar nian mak ladun diak,” nia kritika.
