Kazu feto ho mane foinsa’e barak ne’ebe mate tanba tara an inklui feto balun ema oho no soe ba tasi, tuir Sekretaria Estadu ba Promosaun Igualidade (SEPI), Idelta Maria Rodrigues, katak regras iha uma laran tenke rigorozu nune’e bele kontrola membrus familia sira nia atividades lor-loron. 
SE Rodrigues, hateten problema sira ne’e mosu tanba uma laran laiha regras, ema ida-idak sai tuir nia hakarak ikus mai mosu problema balun tenke lakon nia vida ho sira nia hahalok rasik.
“Uma tenke iha regras, labele dehan agora modernu ona be o sai ba ne’ebe, hau la presiza hatene, labele !, inan aman iha responsabilidade tenke hatene oan la’o ho see no ba ne’ebe?,” nia hateten, iha Kaikoli, Dili.
Sekretaria Estadu mos sente preokupa oituan ho foinsa’e sira husi distritu ne’ebe mai iha Dili lakohi hela ho familia, hakarak hela kos (aluga uma) deit, maibe desizaun ne’ebe sira foti ne’e lolos rsiku ba sira.
“Hakarak kost, tanba kost ne’e bebas,” SE Rodrigues preokupa.
Entretantu Prezidente Grupo Feto Parlamentar (GMPTL), Deputada Josefa Alvares Pereira Soares, husu ba organizasoens feto sira tenke bo’ok an hodi fahe informasaun ba feto maluk sira hotu atu fo seguransa ba an rasik.
“Maibe hau hanoin labele akontese seguransa espesifiku ba feto, tanba sidadaun hotu iha direitu hanesan ba seguransa,” Deputada Pereira hateten.
Nia dehan, violasaun sira ne’e mosu, tanba servisu Polisia Komunitaria no servisu Polisia Inteligensia la funsiona ho diak inklui mos implementasaun lei sira ne’ebe vigora iha rai laran ne’e fraku tebes.
“Entaun ema utilize frakeza ida ne’e viola ema seluk nia direitu,” nia hateten.
