Vitima AP ho AG hetan ta’a iha parte ain no liman hafoin hetan asaltu husi arguido NC ho AA iha oras tuku 12:00 kalan bo’ot iha vitima sira nia uma. 
Tuir deklarasaun vitima AG iha Tribunal Distrital Dili (TDD), katak iha kalan tuku 12:00, arguido ho inisial NC ba halo asaltu iha uma lori katana naruk ho kondisaun lanu hodi ta’a vitima AG nian liman no AP nia ain.
“Ami la hatene, tanba saida maka nia mai halo asaun hirak ne’e,” vitima AG deklara iha TDD, Mandarin, Dili.
Nia hateten, arguido NC tama mai ataka kedas iha odamatan oin, hodi hala’o asaun hirak ne’e, enkuantu arguido AA ba ta’a fali nuu no bua ne’ebe kuda hela iha uma sorin.
Entretantu arguido AA iha nia deklarasauniha TDD, katak sira halo asaun ne’e, tanba wainhira arguido nain rua hamutuk ho kolega hemu tua hela iha NC nia uma, derepenti ema tuda uma.
“Ami hanoin fatuk ne’ebe tuda mai ne’e husi vitima sira nia uma, tanba ne’e maka ami ba asaltu sira,” arguido AA deklara.
Iha deklarsaun iha tribunal ne’e, arguidu nain rua (AA no NC) arepende no rekonese katak saida maka sira nain rua halo ne’e ho kondisaun lanu.
“Asaun sira ne’e ami halo duni no ami rekonese,” nia dehan.
Iha primeiru interogatoriu, vitima nain rua (AG ho AP) husu ba juis haruka arguido nain rua atu selu deit multa hodi fo fila deit osan ne’ebe sira (vitima) uja hodi ba halo tratamentu iha ospital.
Vitima AP husu ba arguido NC atu selu multa hamutuk $200,00 no AG husu $250,00, enkuantu ba arguido AA ne’ebe ta’a nuu tenke selu $50,00.
Hafoin rona tiha deklarasaun hosi arguido no vitimas, Juis Prezidente Yacinta Correira, husu ba arguido nain pronto ga lae atu selu multa hirak ne’ebe vitima sira husu, no arguido hatan katak sira nain rua pronto atu selu multa sira ne’e.
Arguido NC sei selu multa hamutuk $450,00 no arguido AA sei selu multa hamutuk 50 dolares Amerikanu.
