Oknum Polisia Nasional Timor-Leste ho inisial AS halo krimi agravadu simples hasoru lezada ho inisial E.
Kazu ne’e akuntese iha fatin armajen super xerox Audian, iha loron 31 Janeiru 2011. Tuir arguido, katak iha altura ne’eba arguido hetan ameasa via telephone husi ema ida ho insial J, nebe servisu iha fatin ne’e.
Tanba ne’e arguido ho nia kolege ba buka, no wainhira arguido to’o armajen super xerox, derepente lezada ho inisial E sai mai hirus no hakilar no la fo tempu ba arguido atu esplika.
“Hau la hatene, tanba saida nia sai mai no hakilar no dehan polisai ne’e hau la tauk liu,” arguido AS deklara iha julgamentu, iha Tribunal Distrital Dili (TDD).
Nia haktuir, wainhira lezada E hakilar- hakilar derepenti lezada nia oan ho inisial H sai mai, no tebe arguido maibe arguido se’es an tia, no lezada E hamrik no atu baku arguido tanba nervosu arguido baku bosok deit lezada nia hasan.
“Hau baku nia hasan no nia oklu monu tia no rahun,” Konfesa Arguido.
Arguido ne’e dehan , nia halo hahalok sira ne’e atu defende an, tanba nia hetan ona tortura uluk hosi vitima.
Wainhira prosesu julgamentu lao, lezada deside atu la marka prezensa.
Hafoin rona tiha deklarasaun husi arguido, Prokurador Vicente Brito no Prokurador Hernani Rangel husi Ministeriu Publiku, husu ba tribunal atu arguido selu deit multa ba vitima, tanba iha altura ne’eba konsege harahun vitima nia oklu.
Iha parte seluk Advogadu (Defensor Publik) Olga Barreto Nunes, hateten akontesementu ne’e akontese tanba lezada mak buka problema uluk no halo asaun uluk hodi nune’e provoka arguido atu baku lezada, tanba ne’e husi parte defeza husu ba tribunal atu absolve.
Entretantu ba kazu ne’e rasik Juis Prezident, Julio Gantez absolve tiha kazu ne’e, tanba ne’e nudar krimi agravadu simples, no husu ba arguido nudar polisia labele halo tan hahalok hanesan ne’e iha future.
