Membru Parlamentu Nasional preokupa maka’as kona ba rekrutamentu professor voluntariu sai permanente no konsidera la justu no diskunfia iha nepotismu, tanba ema ne’ebe loron-loron fa’an ropa iha merkadu asina kontratu sai funsiunariu permanente.
Deputadu Antonio dos Santos preokupa, tanba professor voluntariu ne’ebe ativu hanorin estudantes, maibe ikus mai negosiantes mak sa’e fali ba professor permanente.
“Balun fa’an ropa no fa’an sasan deit iha merkadu,derepenti asina kontratu, nia mos mosu ona iha ne’eba, KKN mosu barak ona,” Deputadu dos Santos alias 55 kestiona, iha Parlamentu Nasional.
Deputadu husi bankada Fretilin ne’e hateten, nia sempre simu keixa no telefone husi komunidade sira kona ba problema ne’e.
Entretantu Deputada Aurora Ximenes, hateten durante ne’e mane sira (profesores voluntariu) halo diskriminasaun ba profesora voluntariu,mane sira hanorin tinan tolu ga hat rekruta sai permanente maibe feto la hetan, maske hanorin kleur ona.
“Feto sira hanorin tinan hitu to’o tinan walu os la foti sai funsionariu permanente,” Deputada Ximenes lamenta.
Hatan ba kestaun ne’e Ministru Edukasaun, Bendito Freitas, garante katak ho Orsamentu Jeral 2014 $9,520 mil ba Ministeriu Edukasaun bele ona resolve problema professor voluntariu sira.
“Bele responde ba 420,000 profesor voluntariu ne’ebe integra tama iha kontratu atu tama ba kareira definitiva nian,” Ministru Freitas hateten.
