Polisia Komunitaria sei adopta dutrina Vijibilidade,Involvementu no Profesionalismu (VIP) hodi fo atendementu ba iha komunidades iha terenu.
Komandante Jeral Polisia Nasional Timor-Leste (PNTL), Komisariu Longuinhos Monteiru, hateten PNTL orienta atividade hotu-hotu bazea ba dutrina foun ne’ebe fo naran ho VIP.
“Kaer metin karakteristika VIP ida ne’e husi dokumentus ida ne’ebe define,” Komisariu Monteiro hateten, iha Kuartel Jeral Kaikoli, Dili.
Komisariu Monteiro klarifika katak vijibilidade aas polisia nian mak halo komunidade sente seguru, involvementu mak komunidade involve direitamente iha servisu Polisia Komunitaria nian no profesionalismu, mak hatan ho profesionalismu hodi nune’e servisu polisia nian halo satisfas komunidades.
Filosofia polisiamentu komonitaria ne’e, nia dehan, aplika ba membru hotu-hotu iha PNTL nia laran.
Polisiamentu Komunitaria la refere deit ba departamentu ka seksaun espesifiku ida iha PNTL, maibe refere ba aprosimasaun ne’ebe “ita iha ba ita nia servisu iha instituisaun PNTL nia laran no entre PNTL ho komunidades,” nia dehan.
Iha parte seluk Deputadu Cesar Valente de Jesus, hateten VIP nudar modelu foun ida ne’ebe PNTL sei aplika hodi eleva sira nia servisu, ne’e nudar pasu positive ida.
“Ne’e hanesan indikador ida ba sira nia servisu, saida maka sira halo la’o tuir duni saida maka sira rasik trasa ona,” Deputadu deJesus hateten.
Deputadu ne’e mos husu atu halo uluk sosializasaun ba komunidade kona ba modelu no sistema ne’ebe sira sei uja, atu nune’e komunidade bele iha konesementu ba atendementu PNTL iha baze.
