Membru Parlamentu Nasional lamentavel ho kondisaun sala emergensia Ospital Nasional Guido Valadares (HNGV) halo pasiente sira xena malu to’o iha koridor, tanba fatin la to’o.
Deputadu Inacio Moreira, hateten pasientes iha sala emergensia tenke hamriik durante oras tolu nia laran hodi hetan fatin no simu atendementu husi pesoal saude sira.
“Hau kous hau nia oan ne’ebe moras dengue, hein husi tuku 08:00 to’o 12:00 hamriik deit, tanba fatin laiha tau hau nia oan, ne’e labele,” Deputadu Moreira kestiona, iha Plenaria parlamentu Nasional.
Deputadu husi bankada Fretilin ne’e, hateten problema sira ne’e mosu tanba laiha planu ne’ebe diak husi governu, fo liu importansia tau orsamentu ho montante bo’ot halo fali edifisio andar, maibe haluhan tiha povu nia nesesidades.
Entretantu Diretor Klinika HNGV, Doutor Aniceto Barreto, hateten sira iha duni problema maibe atendementu iha sala emergensia laiha pasiente ida mak hamriik deit, sira buka meius atu pasiente sira sente komfortavel hodi hetan atendementu saude.
Nia hatutan, pasiente sira ne’ebe moras jeral hanesan inus metin, mear, isin manas, ulun moras ne’e konserteza hamriik iha linha, maibe sira ne’ebe emergensia no urjenti tenke prioridade.
“Se dehan hamriik iha sala emergensia, hau hanoin la’e, pasiente moras jeral mak hamriik,” nia hateten.
Nia hatutan, Ministerio Saude prepara ona fatin no rekursu humanu iha sentru saude hotu iha Dili laran inklui Sentru Saude Vera Cruz ne’ebe foin lalais mak estabelese, bele dimenui numeru pasiente ne’ebe iha HNGV hodi hetan observasaun husi medikus sira.
