Membru Parlamentu Nasional kestiona maka’as inisiativa komunidade hodi harii eskola iha fatin-fatin tanba estatutu eskola hirak ne’e seidauk klaru.
Iha fiskalizasaun Komisaun F (edukasaun, saude, kultura, veteranus no igualidade jeneru) iha distritus identifika, katak eskola Ensino Sekundariu Salele- distritu Covalima no Eskola Sekundariu Tilomar ne’e inisiativa husi komunidade sira.
“Saida mak ita bo’ot sira sei fo atu legaliza sira nia estatutu ba oin, tanba eskola ne’e harii husi inisiativa komunidade Salele ho Tilomar,” Prezidenti Komisaun F, Deputadu Virgilio Hornai kestiona, iha Parlamentu Nasional.
Entretantu Deputadu Cristovao Barros, hateten kondisaun eskola iha teritoriu Timor laran tomak barak mak at, maibe osan ba kapital dezenvolvementu laiha.
“Hau fo ezemplu hanesan iha Jumalai,distritu Covalima estudantes SMP no SMA eskola hamutuk fatin ida deit,no mos eskola filial Ensino Sekundaria Salele hamutuk ho Pre-sekundariu deit, maibe iha ne’e la preve osan,” Deputadu Barros preokupa.
Tanba ne’e nia sujere ba Ministeriu Edukasaun, tenke tau osan ba kapital dezenvolvementu hodi hadia eskola sira ne’e.
Hatan ba ida ne’e Ministru Edukasaun, Bendito Freitas, katak kazu ida ne’e la’os akontese deit iha Eskola Salele no Tilomar, maibe iha Maubara distritu Liquisa mos akontese.
“Hau hanoin ita nia maun alin sira iha interese diak tebes-tebes atu loke eskola, so ke sira laiha diskusaun previa ho Ministeriu Edukasaun atu bele hare nia kriterius no kondisoens,” Ministru Freitas hateten.
Derepenti loke deit, maibe nia dehan, eskola sira ne’e balun veterana sira mak loke tanba ne’e ministeriu tenke hola medidas.
“Tinan ne’e la rejistu tan alunus foun, maibe kompleta deit alunus sira ne’ebe sira simu tiha ona para atu halo ajustamentu no integrasaun ba sistema ne’ebe lolos nian,”Ministru Edukasaun ne’e hateten.
