Membru Parlamentu Nasional kestiona kona ba funsionamentu Klinika VIP ne’ebe estabelese iha Parlamentu Nasional hodi fo atendementu ba membrus parlamentu sira ne’ebe hetan moras iha oras servisu nian.
Deputada Jacinta Abu Cau Pereira, hateten fou-foun estabelese klinika ne’e fo atendement diak ba membrus Parlamentu kada semana dala rua Segunda no Terseira-feira, maibe tinan hirak ona la funsiona.
“Ami husu para klinika ne’e funsiona fila fali, nune’e bele fo atendementu ba iha membrus parlamentu nasional,” Deputada Abu Cau sujere, iha Parlamentu Nasional.
Nia dehan, pelu menus seman ida dala ida fo atendementu saude ba deputadu/a sira, liu-liu bainhira iha diskusaun ruma hanesan foin lalais diskusaun ba Orsamentu Jeral Estadu 2014, deputadu barak mak tensaun.
“Ne’e deputadu sira presiza konsulta,” nia dehan.
Entretantu Deputada Ilda Maria da Conçeicão, hateten kestaun ne’e sira foti bei-beik ona iha plenaria no hato’o direitamente ba Ministru Saude, maibe to’o agora seidauk iha resposta.
Nia hateten, iha tinan lima kotuk klinika ne’e funsiona ho diak fo atendementu semana ida dala rua, liu-liu bainhira diskusaun orsamentu jeral, karik iha membrus balun hetan moras, mediku no enfermeira fo kedas tratamentu.
“Ami Komisaun F sei buka hatene to’ok, razaun saida mak kuaze tinan ida resin ona klinika ne’e la funsiona hanesan tinan lima kotuk liu ba,”Deputada ne’e hateten.
Deputada ne’e konfesa, husi informasaun ne’ebe komisaun hetan katak enfermeiru sira ne’ebe servisu iha klinika ne’e la tama iha regime especial, entaun hamate sira nia espiritu atu servisu.
